धनुषाधाममा आन्दोलन उग्र,  पुनः तनावग्रस्त, प्रहरीद्धारा लाठीचार्ज

न्यूज ब्युरो ||
धनुषा, २६ माघ ।
हिजो विहिबार विद्यार्थीलाई कुटपिट गरी घाईते बनाएको विरोधमा आज पुनः धनुषाधाम बजार तनावग्रस्त बनेको छ ।

हिजो शिक्षकले विद्यार्थीलाई निर्मतापूर्वक कुटपिट गरी घाईते बनाएको भन्दै विद्यार्थीहरु विहानैदेखि सडकजाम गरेका थिए ।
सडकजाम खोलाउन दुईपक्षबीच सहमतिको लागि बैठक बसेपनि सहमति हुन नसक्दा पुन धनुषाधाम तातिएको हो ।

अहिले भर्खरै विद्यार्थीहरुको आन्दोलन उग्र बनेको छ भने धनुषाधाम बजार बन्द गराइएको हो ।
चक्का जाम सहित गरेका विद्यार्थीहरुको आन्दोलन उग्र भएपनि प्रहरीले लाठी चार्ज समेत गरेको छ ।

लाठीचार्जबाट कोही घाईते नभएपनि विरोधमा विद्यार्थीहरु तथा स्थानीयहरु तोडफोड सुरु गरे लगत्तै धनुषाधामको अवस्था तनावग्रस्त बनेको छ ।

अनियमित पठनपाठनको विरोधमा विद्यालयमा विद्यार्थीहरुले तालाबन्दी गरेका थिए, त्यही ताला खोल्न शिक्षक शुशिल भुजेल सहित ३ जनाले जबरदस्ती गएपछि एक विद्यार्थीले रोक्न जाँदा निर्ममतापूर्वक कुटपिट गरी गम्भिर बनाएको थियो ।

घाईते विद्यार्थीको उपचार जनकपुरमा भइरहेको छ ।
विद्यार्थीलाई क्षतिपूर्ति, नियमित पठनपाठन र दोषीलाई कारवाहीको माग गर्दै विद्यार्थीहरु आन्दोलित भएका छन् ।