धनौजी गाउँपालिकाको राहत गरिबले नपाउँदै कुहाइए

न्यूज ब्यूरो, जनकपुरधाम । धनुषाको धनौजी गाउँपालिकाले गरिब, निमुखाको लागि किनेको राहत समाग्री त्यतिकै सडाएको छ ।

धनौजी गाउँपालिका वडा नं. ३ झौझी कटैयाँमा लकडाउनबाट प्रभावित गरिब, निमुखाको वितरणको लािग राखेको राहत उनीहरुलाई नदिएपछि अन्तत सडेको हो । वडा कार्यालयको पछाडी राहतको लागि ल्याएको चामल कुहिएर फालिएको अवस्था फालिएको भेटिएको हो ।

गाउँपालिकाले वडा नं. ३ का अत्यन्त गरिब, विपन्न परिवारको लागि ल्याएको राहत समाग्री उनीहरुलाई समयमा नदिएपछि स्टोरमै सडेको जनता समाजवादी पार्टीका युवा नेता एवम् गाउँपालिका अध्यक्षका प्रत्यासी जीवेन्द्र झाले आरोप लगाए ।

निरन्तर लकडाउन र निषेधाज्ञाले भोकै छटपटाइरहेको गरिब निमुखालाई नदिएर राहतको राजनीतिले लाखौंको राहत त्यतिकै सडेको आरोप लगाएको हो । कैयौँ महिनादेखि कोठामै थन्काएर चामल राख्दा कुहिएको बताउँदै उनले कुहिएर गन्हाएपछि मात्र बाहिर फालेपछि कर्मकाण्ड बाहिर आएको बताएका छन् ।

सरकारले स्थानीय सरकारलाई लकडाउनबाट प्रभावित अन्यन्त गरिब परिवारलाई तत्काल राहत उपलब्ध गराउन निर्देशन दिएको थियो । जनप्रतिनीधिहरुले राहतमा पनि बेईमानी गरेर लाखौं करोडौं झवाम्म पारेका छन् ।