सिरहाका एसपीका सुरक्षा गार्ड र गाडी चालकमा कोरोना पुष्टि

न्यूज ब्यूरो, सिरहा । सिरहाका प्रहरी प्रमुख एसपीको सुरक्षा गार्ड र गाडी चालकमा कोरोना संक्रमण भएको पाइएको छ ।

राष्ट्रिय जनस्वास्थ्य प्रयोगशाला टेकुमा गरिएको परीक्षणमा बुधबार उनीहरुमा कोरोना संक्रमण पुष्टि भएको हो । प्रहरीहरुको स्वाव संकलन गरी परीक्षणको लागि पठाइएकोमा दुईजनामा संक्रमण देखिएको छ ।

उनीहरुलाई आइसोलेसनमा पठाउने तयारी भइरहेको सिरहाका प्रमुख जिल्ला अधिकारी सरोज प्रसाद गुरागाईले जानकारी दिए ।

एसपी उमाप्रसाद चतुर्वेर्दीको भने हिजो (मंगलबार) मात्रै स्वाव संकलन गरिएको छ । उनको स्वाव टेकु पठाउने तयारी भइरहेको प्रजिअ गुरागाईले बताए ।

‘उहाँको हिजोमात्रै स्वाव संकलन भएको छ, पठाउने तयारीमा छौं,’ उनले न्यूज ब्यूरोसँग भने । यससँगै सिरहामा संक्रमितको संख्या ८ पुगेको छ ।