पूर्वमन्त्री यादवद्धारा धनुषाधाम क्वारेन्टाइन व्यवस्थापनको प्रशंसा

न्यूज ब्यूरो, धनुषा । निवर्तमान उद्योग, वाणिज्य तथा आपूर्ति मन्त्री मातृका प्रसाद यादवले आफ्नो निर्वाचन क्षेत्र अन्तर्गतका विभिन्न स्थानका क्वारेन्टाइन अनुगमन गरेका छन् ।

धनुषा निर्वाचन क्षेत्र नम्बर १ बाट निर्वाचित पूर्वमन्त्री यादवले स्थानीय तहरुमा निर्माण गरिएका क्वारेन्टाइनहरूको अनुगमन गरेका हुन् ।

खाडी मुलुक तथा भारतबाट आइपुगेका व्यक्ति र शंकास्पद व्यक्तिलाई निगरानी गर्न निर्माण गरिएका क्वारेन्टाइनको अनुगमनको क्रममा शुक्रबार उनले धनुषाधाम नगरपालिकाको क्वारेन्टाइन अनुगमन गरे । क्वारेन्टाइन तथा कोरोना नियन्त्रणका लागि नगरपालिकाले गरेको व्यवस्थापनको बारेमा उनले जानकारी लिएका छन् ।

सो क्रममा उनले प्रदेश २ कोरोना संक्रमणको उच्च जोखिममा रहेको भन्दै उच्च सतर्कता अपनाउन लागि नगरपालिकालाई निर्देशन समेत दिएका छन् । उनले धनुषाधाम नगरपालिकाको प्रशंसा पनि गरे । नगरपालिकाले क्वारेन्टाइनमा जडान गरेको सीसीटिभी क्यामेरा, ओछ्यान व्यवस्थापन, सफा कोठा, पोषण युक्त खाना तथा स्वास्थ्यकर्मी टोलीको सक्रियता देखेर खुशी लागेको उनले बताए ।

साथै, उनले अनुगमनको क्रममा नगरपालिकालाई २५ सय मेडिकीट, मास्क, सेनिटाइजर हस्तान्तरण पनि गरेका छन् । उनले चाँडै नै ११ थान थर्मल गन उपलब्ध गराउने बाचा पनि गरे । अनुगमनका क्रममा धनुषाधाम नगरपालिकाकी उपप्रमुख विद्यादेवि भुजेल, प्रमुख प्रशासकीय अधिकृत गणेशराज कार्की, नगर स्वास्थ्य सुपरभाइजर एवं कोरोना फोकल पर्शन रामकृष्ण यादवसहित वडाध्यक्षहरु उपस्थित थिए ।

यस्तै, उनले गणेशमान चारनाथ नगरपालिकामा रहेको क्वारेन्टाइन स्थल पनि उनले अनुगमन छन् । अनुगमन टोलीमा पूर्वमन्त्री यादवसहित नेकपाका धनुषा सचिव दीपक यादव, नेकपाका सूर्यनाथ यादव, जोग यादव लगायतका थिए ।