मिर्चैया : राहत माग्दै वडा कार्यालयमा धर्ना

न्यूज ब्यूरो, सिरहा । लकडाउनका कारण दैनिकी चलाउन मुस्किल परेपछि मिर्चैया नगरपालिका ७ का स्थानीयवासीले राहत उपलब्ध गराउन माग गर्दै वडा कार्यालयमा धर्ना दिएका छन् ।

दैनिक ज्यालादारी गरेर गुजारा गर्दै आएका उनीहरुले हालसम्म पनि राहत नपाएपछि वडा कार्यालयमै पुगेर धर्ना दिएका हुन् । करिब सयौंको संख्यामा गएर उनीहरु वडा कार्यालयमा धर्ना दिएर बसेको जसपाका रामेश्वर यादवले जानकारी दिए ।

यसअघि हिजो (शुक्रबार) मात्रै सर्वदलीय समितिका विभिन्न दलका प्रतिनिधिसहित स्थानीयहरुले वडा कार्यालय घेराउ गरेका थिए । लकडाउनका कारण मजदुरी गर्न नपाएर गरिब विपन्नको जीवन कष्टकर बनेको र हालसम्म राहत वितरण नगरिएको तथा वितरण नहुँदै राहतको पोका नै गायब भएको भन्दै कार्यालय घेराउ गरिएको थियो ।

यो पनि पढ्नुहोस् : मिर्चैया : वितरण नहुँदै राहत गायब भएपछि वडा कार्यालय घेराउ

सररकारले सर्वदलीय समिति मार्फत् राहत वितरण कार्य गर्न निर्देशन दिएपनि वडाध्यक्षले मनोमानी गर्दै एकलौटी ढंगले सूचि बनाएको र यस्तो परिस्थितिमा पनि पार्टीबाट माथि उठ्न नसकेको उनीहरुको गुनासो छ ।

नगरपालिकाले दोश्रो चरणको राहतको लागि वडा कार्यालयलाई रकम उपलब्ध गराएको हप्तौ बित्न लाग्दा पनि हालसम्म राहत वितरण भएको छैन । यस सम्बन्धमा वडा नम्बर ७ का वडाध्यक्ष रामकुमार यादवसँग प्रतिक्रिया लिन खोज्दा सम्पर्क हुन सकेन ।