विदेह नपा ५ मा राहत वितरण सौहार्द वातावरणमा भयो : वडाध्यक्ष गोईत

न्यूज ब्यूरो, जनकपुरधाम । धनुषाको विदेह नगरपालिका वडा नं. ५ का वडाध्यक्ष विजय गोईतले राहत वितरण कार्यक्रम सौहार्द वातावरणमा सम्पन्न भएको बताएका छन् ।

विदेह नगरपालिकाले लकडाउन प्रभावितहरुको लागि गरेको राहत वितरणको क्रममा कुनै ठाउँमा विवाद भएपनि वडा नं. ५ मा भने सौहार्द वातावरणमा सम्पन्न भएको बताइएको छ ।

वडाध्यक्ष गोईतले वडाभरिमा रहेको अति विपन्न परिवारहरुलाई राहत प्रदान गरिएको बताएका छन् । लकडाउनका कारण दैनिक ज्यालामा काम गर्ने मजदुर, गरिब, विपन्नहरुलाई राहत प्रदान गरिएको जनाइएको छ ।

वडाभरिमा ५ सय ३७ जनालाई राहत वितरण गरिएको जनाइएको छ । उनीहरुलाई १० किलो चामल, १ किलो दाल, १ किलो नुन, १ किलो चुरा र आधी किलो तेल गरी राहत दिएको हो ।

परिवारिक हिसाबले नभएपनि एकमुष्ट रुपमा प्रभावित ५ सय ३७ घरधुरीलाई एकनासे राहत वितरण गरिएको वडाध्यक्ष गोईतले बताए ।

उनले सरकारले लगाएको लकडाउन र कोरोना भाइरसको सँक्रमणबाट जोगिन लगाएको सोसल डिस्टान्सको प्रावधानलाई मध्यनजर गर्दै राहत वितरण गरिएको जनाएका छन् ।

उनले पहिलो चरणको राहत वितरण गरेको भन्दै दोस्रो चरणको लागि राहत वितरणको तयारीमा जुटेको बताए ।