सिरहामा जथाभावी पार्किङ रोक्न ट्राफिकले चलायो ह्विल लक अभियान

न्यूज ब्यूरो, सिरहा । सिरहामा जथाभावी पार्किङ गर्ने सवारीसाधनमा ट्राफिक प्रहरीले ह्विल लक लगाउने अभियान सुरु गरेको छ ।

ट्राफिक प्रहरीले सिरहाको विभिन्न बजार क्षेत्रमा नो पार्किङमा राखिने चारचक्केभन्दा माथिको सवारीसाधनमा ह्विल लक लगाउने अभियान चलाएको हो । जथाभावी पार्किङले बजार क्षेत्रमा ट्राफिक समस्या सृजना हुने गरेकाले ह्विल लक लगाउने अयिभान थालेको जनाएको छ ।

जिल्ला ट्राफिक प्रहरी कार्यालय लहान सिरहाका प्रमुख खगेन्द्र एक्टेनका अुनसार, सिरहाले पूर्व पश्चिम राजमार्गको लहान, मिर्चैया, बन्दिपुर, गोलबजार लगायतको बजार एरियामा नो पार्किङमा पार्किङ गरेको सवारीमा ह्विल लक लगाउने र ट्राफिक नियम बमोजिम जरिवाना भराउने अभियान थालेको जनाएको छ ।

ट्राफिक व्यवस्थापन गर्न विस्तारै जिल्ला भरि यो अभियान थाल्ने योजना रहेको ट्राफिक प्रहरी प्रमुख एक्टेनले जानकारी दिए । ट्राफिक प्रहरीले यो अभियान चलाएपछि सहर बजारमा ट्राफिक जामको समस्या अन्त्य हुने विश्वास गरिएको छ ।