वीरगञ्जबाट नक्कली लाइसेन्स बनाउने २ दलाल फन्दामा

न्यूज ब्यूरो, वीरगञ्ज । वीरगञ्जबाट नक्कली सवारी चालक लाइसेन्स बनाउने दुईजनालाई प्रहरीले पक्राउ गरेको छ ।

वीरगञ्ज महानगरपालिका ११ का ५१ वर्षका मोहनलाल राउत कुर्मी र सोही स्थानका ४२ वर्षीय घनश्याम भण्डारीलाई प्रहरीले पक्राउ गरेको हो । नक्कली सवारी चालक अनुमति पत्र बनाउने कार्यमा संलग्न रहेको आरोपमा उनीहरुलाई पक्राउ गरिएको प्रहरीले जनाएको छ ।

उनीहरु बाराको कोल्हवी नगरपालिका ४ प्रगति नगरका २१ वर्षीय रमेश चौधरीको बी श्रेणीको नक्कली सवारी चालक अनुमति पत्र बनाउने कार्यमा संलग्न थिए । नक्कली सवारी चालक अनुमति पत्र बनाउन प्रयोग गरिएको कागजातसहित पक्राउ गरी थप अनुसन्धान भइरहेको जनाइएको छ ।