रौतहटका बाढी पीडितद्धारा नपा कार्यालयमा ढुंगामुढा : मेयर टाप, उपमेयर प्रदर्शनमा !

न्यूज ब्यूरो, रौतहट । रौतहट डुवानमा परेदेखि बाढी पिडितको अवस्था अझ समान्य हुन सकेको छैन । घर बगेकालाई घरको चिन्ता छ, अन्न बगेकालाई अन्नको चिन्ताले सताइरहेको छ । मृतक र घाईते परिवारको कुरै छौडौ, तिनीहरुको दुःखको व्यख्या गर्न नसकिने अवस्था छ ।

गाई वस्तु गोठ नपाएर बिना पाल खुल्ला आकासमा बाधीनु पर्ने बाध्यता छ । सरकार खाली हात आएर गए, धेरै भिआइपी आउछन्, जान्छन् । आशा र दिलासा सुनेरै दिनरात काटिरहेका रौतहटको राजदेबी नगरपालिकाका बाढी पीडितहरु एक्कासी आक्रोशित भई नगरपालिकामाथि ढुंगामुढा गरेका छन् ।

शुक्रबार हजारौंको संख्यामा आएका पीडितहरुले चर्को नाराबाजी गर्दै नगरपालिका कार्यालय घेराउ गरेका हुन् । बाढी आएको १४ दिन हुँदा समेत अहिलेसम्म राहतको नाउँमा केही नदिएको गुनासो गर्दै उपप्रमुख अंशु सिंहको नेतृत्वमा आएका पीडितहरुले नगरपालिकाको मेन गेटमा ढुङ्गा प्रहार गर्दै नाराबाजी गरे । केहि वडामा विभेदपूर्ण तरिकाले जनप्रतिनिधिहरुले आफ्ना आसेपासेलाई मात्र राहट बाँडेको भन्दै नगरका पिडित जनताहरु आक्रोशित बनेका हुन् ।

स्थानीय मुना यादवले दिएको जानकारी अनुसार, नगरपालिकाले वास्तविक बाढी पीडितलाई उपेक्षा गरेपछि बाढीबाट प्रताडित सर्वसाधारणहरु नगरपालिकाको कार्यालय घेर्न पुगेका छन् । बाढी पीडितहरुको ठूलो भिड देखर मेयर धिरेन्द्र सिंह भने कार्यालयबाटै टाप कसेको नगरकी उपप्रमुख अंसु सिंहले बताइन् । मेयर सिंहले आफ्नो माबाईल समेच स्विच अफ गरेको छ ।

गत २८ गते आएको बाढीले बागमती नदीको छेउमै रहेको बस्तीहरुमा ठूलो क्षती पुर्याउँदा पनि नगरपालिकाले राहतको नाउँमा केही नदिएको र पछि लाखौं लाख रुपैयाँको राहत बितरण गरेको बिल बनाउने तयारी गरेको आरोप लगाउँदै उपप्रमुख सिंहले समेत चर्को बिरोध जनाइन् । आफू पटकपटक बिपद् ब्यस्थापनको बैठक बसाउन माग गर्दा कुनै वास्ता नगरेकोले यो दिन देख्नु परेको उपमेयर सिंहको भनाइ छ ।

जिल्ला प्रशासन कार्यालय रौतहटबाट आएको राहत पनि अहिलेसम्म वितरण नगर्दा बाढीपीडितहरु थप आक्रोशित बनेको सिंहले बताइन् । उनले भनिन्, ‘जिल्ला प्रशासन कार्यालयले मेयर साहेबको नेतृत्वमा गएका जनप्रतिनिधिको टोलिलाई ५०० पोका राहत दिएको सुने, तर त्यो राहत कहाँ गयो–गएन थाह छैन ।’ उपप्रमुख सिंह बाढी पीडितहरुकै अगाडि मेयरमाथि आक्रोश पोखिन् ।

उनले सिंगो नगरपालिकाको सबै काम आफूलाई वाईपास गरेर मेयरले नै गर्ने गरेको आरोप लगाइन् । जनतालाई अहिले राहतको आवश्यकता रहेकाले जनताको घरघरमा पुगी वास्तविक पीडितलाई राहत बाड्नका लागि उलने मेयरलाई आग्रह समेत गरिन् ।

बाढीपीडितको भिड नियन्त्रण गर्न नेपाल प्रहरी, जनपद् प्रहरी र नगर प्रहरी गएपनि सुरक्षाकर्मीलाई उछिनेर उनीहरु मेन गेटको ताल्चा नै फुटाएर भित्र छिरेका थिए । प्रदर्शनकारीको ढुंगा प्रहारबाट नगर कार्यपालिकाको मेन गेटमा सामान्य क्षति भएको छ ।