कमाण्ड सम्हालेको एक सातामै सशस्त्रका ईन्सपेक्टर अजय ठाकुरको टोलीद्वारा ५७० किलो गाँजा बरामद

न्यूज ब्यूरो, विराटनगर । सशस्त्र प्रहरी बल नेपालका प्रहरी निरीक्षक अजय ठाकुरको कमाण्डमा खटिएको टोलीले मोरङमा तरकारीको बीचमा लुकाएर राखिएको करिब ५७० किलो प्रतिबन्धित लागूऔषध गाँजा बरामद गरेको छ ।

सशस्त्र प्रहरी बल नेपाल नं। ३ गण हेडक्वार्टर कंकालिनी, मोरङअन्तर्गत बीओपी नोचाबाट खटिएको टोलीले असोज २४ गते जहदा गाउँपालिका–४ स्थित रामचोकबाट गाँजा बरामद गरेको हो ।

प्रहरी निरीक्षक ठाकुरको कमाण्डमा खटिएको टोलीले शंकास्पद अवस्थामा रहेको प्रदेश १–०१–०० च ७४२२ नम्बरको महेन्द्र पिकअप भ्यानलाई जाँच गर्न खोजेको थियो । तर, चालक गाडी छाडेर फरार भएपछि भ्यान जाँच गर्दा तरकारीको बीचमा लुकाइएका १९ पोका गाँजा फेला परेको सशस्त्र प्रहरीले जनाएको छ ।

बरामद गाँजाको तौल करिब ५७० किलो रहेको छ । गाँजा र पिकअप भ्यानलाई बीओपी नोचामा ल्याई आवश्यक कानुनी प्रक्रियाका लागि नेपाल प्रहरीलाई बुझाउने प्रक्रिया अघि बढाइएको जनाइएको छ ।

बीओपी नोचाको कमाण्ड सम्हालेको एक साता पनि नबित्दै प्रहरी निरीक्षक ठाकुरको नेतृत्वमा ठूलो परिमाणमा प्रतिबन्धित लागूऔषध बरामद हुनुलाई लागूऔषध नियन्त्रण अभियानमा महत्त्वपूर्ण उपलब्धिका रूपमा हेरिएको छ ।

सीमा क्षेत्रमा हुने अवैध ओसारपसार नियन्त्रण तथा लागूऔषध कारोबारविरुद्ध सुरक्षा निकायको सक्रियता आवश्यक भइरहेका बेला ठाकुर नेतृत्वको टोलीको यो कारबाहीले सीमावर्ती क्षेत्रमा निगरानी र सुरक्षा व्यवस्थाको महत्त्वलाई थप उजागर गरेको छ ।