आरपीद्धारा शिक्षकलाई रबाना बिना नै तलब

न्यूज ब्यूरो, जनकपुरधाम । धनुषाधाम नगरपालिकाको शिक्षा सँयोजक एवम् श्रोत व्यक्ति (आरपी) समेत रहेका उद्धव बहादुर आचार्यले एक शिक्षकलाई गैरकानुनी रुपले तलब खुवाएको खुलासा भएको छ ।

धनुषाको हरिपुर निगाहपुरमा पठनपाठन गराउँदै आएको स्थायी शिक्षक सरोज कुमार महतोलाई अवैद्यानिक रुपमा तलब निकासा गरिदिएको स्रोतले जनाएको छ । हाल नि.मा. वि. नौयसयविघामा पढाउँदै आएको शिक्षक महतोले साबिकको विद्यालय मावि हरिपुर निगाहपुरबाट स्थानीय व्यवस्थापन समितिले सरुवाको लागि निर्णय गरेको बताउँदै नौसयविघामा अध्ययन अध्यापन गराउँदै आएको बताइएको छ ।

शिक्षक महतोको स्थायी नियुक्ती भएकोले नगरपालिका भित्रैको कुनै विद्यालयमा समायोजन गरेको आरपी उद्धव बहादुर आचार्यले बताए । उनले भने, हरिपुर निगाहपुरमा पढाउँदै आएका शिक्षक सरोज कुमार महतोलाई कुनै कारणवंश विद्यालयमा नराख्ने वातावरण उब्जिएपछि त्यहाँबाट सरुवाको लागि सिफारिस र समितिको निर्णयलाई मध्यनजर गर्दै नौयसविघामा काज सरुवा दिएको हो ।

यता, काज सरुवा गर्दा रबाना बुझे मात्र तलब भत्ता खान सक्ने प्रावधान रहेपनि साबिकको विद्यालयबाट रबाना नबुझेपनि आरपी आचार्यले अवैद्यानिक रुपमा तलब खुवाएको आरोप प्रध्यानाध्यापक राम एकवाल महतोले बताए ।

आरपी आचार्यले शिक्षक महतोसँग मोटो रकम लिएर नौयसविघामा काज सरुवा गराएको आरोप एक स्थानीयले नाम नखोल्ने शर्तमा बताए । शिक्षक महतोको काज सरुवाको लागि जिल्ला समन्वय इकाई धनुषाले यादव मावि बेल्हीमा गरेपनि अवैद्यानिक रुपमा नौयसविघाको विद्यालयमा पढाएको र तलब समेत खाने गरेको बताइएको छ ।

आरपी आचार्यले शिक्षक महतोसँग निर्णय, सरुवा पत्र, रबाना पत्र सबै भएको दाबी गरेका छन् भने शिक्षक महतोले आफूसँग रबाना पत्र नभएको बताए ।

शिक्षक महतोको सरुवा बेल्ही स्कूलमा गरिएको छ तर आरपी आचार्यले माटो रकम लिएर बलपूर्वक नौसयविघाको स्कूलमा राखेको आरोप लगाइएको छ ।

यता, जिल्ला समन्वय इकाई धनुषाका प्रमुख बरखु प्रसाद रजकले सरुवा गरिएको सम्बन्धित विद्यालयमा नै जानुपर्ने बताए । न्यूज ब्यूरोसँग कुराकानी गर्दैै प्रमुख रजकले शिक्षक महतोलाई सरुवा पत्र काटिएको बेल्ही विद्यालयमा नै पठाउन समेत पत्र काटिने बताए ।

नौयसविघा विद्यालयका प्रधानाध्यापक देव नारायण कापडीले आफूलाई सरुवाबारे कुनै जानकारी नरहेको तथा विद्यालयमा शिक्षक सहित जिल्ला समन्वय इकाईको पत्र समेत पठाएकाले हाजिरी गराएको बताए ।

यस सन्दर्भमा धनुषाधाम नगरापालिकाका मेयर बालेश्वर मण्डलले आफूलाई साधेपछि मात्र जानकारी भएको भन्दै छानबिन गर्ने बताए । न्यूज ब्यूरोसँग कुराकानी गर्दै मेयर मण्डलले स्थानीय तहका हालातप्रति दुःख व्यक्त गर्दै उनले विग्रिएको कार्य प्रणाली मनमौजीलाई लगाम लगाउने बताए ।

गत कार्तिक ११ गते मात्र धनुषाको सर्सा स्कूलमा अवैद्यानिक रुपमा राहत कोटाको शिक्षक भर्नामा अनियमितता भएको भन्दै विद्यार्थी र अभिभावकले ताला हानेका थिए । ताला हानेपछि परीक्षा रद्द गर्दै पुनः लिइने भएपछि तालाबन्दी खोलिएको हो ।