पप्पुलाई पक्राउ पूर्जी !

संजय सहनी, रौतहट । रौतहटको पप्पु कन्स्ट्रक्सनलाई जिल्ला अदालत रौतहटले पक्राउ पूर्जी जारी गरेको छ ।

डुङ्गा दुर्घटनामा ५ जनाको मृत्यु भए पछि गौर ४ टिकुलीयाका स्थानियहरुले निर्माण कम्पनी पप्पु कन्सट्रक्सनलाई मुद्दा दायर गरेका थिए । जिल्ला अदालत रौतहटले पप्पु कन्ट्रक्सनका संचालक सुमित रौनियारलाई पक्राउ पुर्जी जारी गरेको छ ।

भवित्ब्य ज्यान मुद्दामा प्रहरीले अनुसन्धानको लागि पप्पु कन्ट्रक्सनका संचालकलाई पक्राउ गरेर उपस्थित गराउन अदालत संग अनुमती माग गर्दा त्यहाँबाट अनुमती प्राप्त भएपछि जिल्ला प्रहरी कार्यालय रौतहटले जनाएको छ । पक्राउ पूर्जी पछि पर्सा र वडा प्रहरी कार्यालय नयाँ बानेश्वरमा पक्राउ पुर्जी पठाइएको जिल्ला प्रहरी कार्यालय रौतहटले जनाएको छ ।

पप्पु कन्ट्रक्सनका संचालक सुमित रौनियारलाई पटक पटक कार्यालयमा उपस्थित भई अनुसन्धान कार्यमा सहयोग पुर्याउन फोन मार्फत आग्रह गर्दा अटेरी गर्दै समय लम्ब्याउदै गएपछि बाध्य भइ रौतहट जिल्ला अदालतबाट उपस्थित हुन अनुमती माग गर्दा पक्राउ पुर्जी जारी गरिएको हो । कन्सट्रक्सनका संचालक सुमित पर्साका साँसद हरिनारायण रौनियारका छोरा हुन ।

भदौ ९ गते रौतहटको गौर नगरपालिका वडा नम्वर ४ स्थित टिकुलीया घाटमा पप्पु कन्ट्रक्सनद्धारा निर्माणाधिन पक्कि पुलको पिलरमा राति ७ बजेको समयमा ठोकिएर २९ जना सवार डुंगा दुर्घटना हुँदा पाँच मृत्यु भएको थियो । दुर्घटनामा घाइते भएका २४ जनालाई नेपाल प्रहरी, सशस्त्र प्रहरी र नेपाली सेनाको गोताखोर टोलीको साथै स्थानीय बासिन्दाहरु जिवित उद्धार गरेका थिए ।

रौतहटमा पप्पुको दुई वटा पुल निर्माणाधिन रहेको छ । गौर ४ को टिकुलीयामा लाल बकैया नदीको पुल र चन्द्रनिगाहपुरमा चाँदी नदीमा अर्को एक पुल निर्माणाधिन रहेको छ ।

जिल्ला प्रहरी कार्यालय रौतहटले मुलुकी फौजदारी कार्र्यिवधि संहिता ऐन २०७४ को दफा ९ को उफा २ बमोजिम पक्राउ गर्न जिल्ला अदालत समक्ष माग गरेकोमा अदालतले असोज ४ गते पक्राउ गर्न आदेश जारी गरेको उक्त पक्राउ पुर्जीमा उल्लेख गरिएको छ । एसपी ढकालका अनुसार रौतहट प्रहरीले पर्सा प्रहरीलाई असोज ५ गते सुमितलाई पक्राउ गरिबुझाउन पत्र काटेकोमा पर्सा प्रहरीले उनी काठमाडौंमा रहेको खवर दिएपछि पुनः महानगरीय प्रहरी परिसर काठमाडौं र प्रहरी वृत बानेश्वरलाई पत्र पठाइएको उनले जानकारी दिए ।

डुंगा दुर्घटनामा परी गौर नगरपालिका वडा नम्वर ४ की ४५ वर्षीया इन्दुदेवी पटेल, ६४ वर्षीया शान्तिदेवी साह, १० वर्षीया उष्मा कुमारी पटेल, सहचालक ओमप्रकाश चन्द्रवंशी र इशनाथ नगरपालिका औरैयाकी ४५ वर्षीया रुनादेवी पटेलको ज्यान गएको थियो । घटना पश्चात जिल्ला प्रशासन कार्यालय रौतहटले सहायक प्रमुख जिल्ला अधिकारी धर्मानन्द जोशीको नेतृत्वमा छानविन टोली गठन गरी अनुसन्धान कार्य सुरु गरेका थिए ।

२०७१ असार २९ गते १४ करोड ९३ लाखमा पप्पु कन्ट्रक्सनले ठेक्का सकार गरेर २०७४ साल असार २५ गते भित्र निर्माण कार्य पुरा गर्न लिखित सम्झौता संचालक हरिनारायण रौनियारले गरेका थिए ।