आन्दोलनविना देशमा कुनै परिवर्तन हुनै सक्दैन : राज्यमन्त्री शर्मा

न्यूज ब्यूरो, महोत्तरी । प्रदेश नं. २ का समाजिक विकास राज्यमन्त्री अभिराम शर्माले आन्दोलनविना देशमा कुनै परिवर्तन हुन नसक्ने दावी गर्नुभएको छ ।

शनिवार जनकपुरमा आयोजित प्रदेशस्तरीय राहतशिक्षकहरुको भेलालाई सम्बोधन गर्नुहुँदै राज्यमन्त्री शर्माले विगतको ईतिहासलाई स्मरण गर्ने हो भने नेपालमा कुनै पनि परिवर्तन आन्दोलनको विना सम्भव नभएको जिकिर गर्नुभयो ।

राहत शिक्षकहरु पनि बर्षौैदेखि सरकारको विभेद सहदै आएकोले अव अधिकार प्राप्ती गर्नका लागि बर्तमान समयमा आन्दोलनको कुनै विकल्प नरहेको राज्यमन्त्री शर्माले तर्क राख्नुभयो ।

शिक्षकहरुको ज्याज माग सम्बोधन गर्नका लागि प्रदेश सरकार तयार रहेकोले प्रदेश सरकार शिक्षकहरुको हरपल साथमै रहने शर्माले प्रतिवद्धता जनाउनुभयो । राहत शिक्षक संघर्ष समितीले अगामी भदौ २६, २७ र २८ देशभरिकै शैक्षिक संस्था बन्द गर्ने भएका छन ।

देशभरिका सामुदायिक विद्यालयमा कार्यरत राहत शिक्षक संघर्षले शैक्षिक संस्था बन्द गरि आन्दोलन गर्ने भएका छन । शनिवार जनकपुरस्थित पगलावावा धर्मशालामा आयोजित राहत शिक्षकको प्रदेशस्तरीय भेलाले सो निर्णय गरिएको हो ।

राहत शिक्षक संधर्ष समितीका प्रदेश नं. २ का सदस्य एवम केन्द्रिय उपाध्यक्ष प्रदीप यादवले सरकारले राहत शिक्षकहरुमाथि विभेद गर्दै आएको जनाएको छ । सरकारले देशमा राहत, अस्थायी, स्थायीजस्ता उपमा दिएर शिक्षकलाई फुटाउने कार्य गर्दै आएको अध्यक्ष यादवले जनाउनुभएको छ ।