राहत शिक्षकको प्रादेशिक भेला भदौ २३ गते जनकपुरधाममा हुने

न्यूज ब्यूरो, महोत्तरी । राहत शिक्षक संघर्ष समितीको प्रदेश नं. २ स्तरिय भेला यहि भदौ २३ गते जनकपुरधाममा हुने भएको छ । शिक्षा विधेयक ऐनमा राहत शिक्षकको हकहितमा सरकारले विभेद गरेको समयमा सोही सन्दर्भमा छलफलका लागि प्रदेशस्तरिय भेलाको आयोजना गरेको जनाएको छ ।

राहत शिक्षकका हकहितको लागि सरकारलाई दवाव दिनका लागि अगामी रणनितीको सम्बन्धमा छलफलको आयोजना गरिएको संघर्ष समितीका केन्द्रिय उपाध्यक्ष एवम प्रदेश नं. २ का संयोजक प्रदीप यादवले बताउनुभएको छ ।

देशमा राहत विनाको विद्यालयको कल्पना गर्न नसकिने सन्दर्भमा सरकारले शिक्षा ऐनमा आफुहरुलाई विभेद गरेको विरुद्धमा विभिन्न चरणका आन्दोलन गर्नुपर्ने भएकोले सोही अनुरुप राहत शिक्षकहरुलाई प्रशिक्षण समेत दिईने भएको यादवले जनाउनुभयो ।

यसभन्दा अगाडि केन्द्रिय समितीले नेपाल सरकारलाई बुझाएको तीन बुँदे माग भदौ २३ गतेभित्र पुरा नगरे अगामी भदौ २६, २७ र २८ गते देशव्यापीरुपमा शैक्षिक हडताल गरिने संयोजक यादवले बताउनुभयो ।

यता राहत शिक्षक संघर्ष समिती महोत्तरीकी सदस्य सुनिता कुमारीले माग सम्बोधन गराउनका लागि सरकारलाई दवाव दिनको लागि शैक्षिक हडतालको विकल्प नरहेको जनाईन । देशभरिमा ४० हजारको हाराहारीमा राहत दरबन्दीमा शिक्षकहरु कार्यरत रहेका छन् ।