२ महिना भित्रै रेल्वे सञ्चालन गर्न मन्त्री मनडवियाको निर्देशन !

न्यूज ब्यूरो, जनकपुरधाम । भारतीय सरकारका केन्द्रिय सडक,यातायात तथा राजमार्ग राज्यमन्त्री मनसुख लक्ष्मणभाई मनडवियाले आगामी २ महिना भित्र जनकपुरधाम–जयनगर रेल्वे संचालन गर्न निर्देशन दिएका छन ।

रेल्वेको कार्यप्रगति र हुलाकी सडकको कार्यप्रगतीको बारेमा बुझ्न सोमवार जनकपुरधाम आएका मन्त्री मनडवियाले जनकपुरधाम उपमहानगरपालिका कुर्था टोल स्थित निमार्णाधिन रेल्वे स्टेशनको निरिक्षण गर्दै उनले यस्तो निर्देशन दिएका हुन ।

जनकपुरधाम विमानस्थलमा अवतरण पश्चात उनी जानकी मन्दिरमा दर्शन गर्दै रेल्वेको कार्यप्रगतीको बारेमा निरिक्षण गर्न कुर्था पुगेका थिए । त्यसपछि मन्त्री मनडविया जनकपुरधाम उपमहानगरपालिका–१७ स्थित तेतरिया टोलमा पुगेर शहिद मार्ग हुलाकी राजमार्ग अन्तर्गत निर्माणाधिन सडकको निरिक्षण समेत गरेका थिए ।

करिव ५ सय करोडको बजेट रहेको सो सडक खण्डलाई छिट्टै निमार्ण सम्पन्न गर्न निर्देशन समेत दिएका थिए । भारत सरकारको सहयोगमा निमार्ण भइरहेको सडक र रेल्वेको कार्यप्रगतिको बारेमा जानकारी लिन पहिलो पटक जनकपुरधाम आएका मन्त्री मनडवियालाई जनकपुरधाम उपमहानगरपालिकाका मेयर लालकिशोर साहले भव्य स्वागत गरेका थिए ।