धनुषाधाम वनमा सखुवा वृक्षलाई 'धनुष सखुवा' नामकरण

न्यूज ब्यूरो, जनकपुरधाम ।  धनुषाधाम सव–डिभिजन वन कार्यालयको प्राङ्गणमा रहेको दुर्लभ स्वरूपको सखुवा ९साल०को रूखलाई औपचारिक रूपमा “धनुष सखुवा” नाम दिइएको छ। 

गणेशको स्वरूपमा देखिने यस सखुवा रूखको जरा करिब २० फिट लामा तथा बिचको मोटाई १५ फिट रहेको छ। मधेश प्रदेश सरकारले राष्ट्रिय वृक्षारोपण दिवसको अवसर पारेर आयोजित विशेष समारोहका बीच यस विशिष्ट रूखलाई 'धनुष सखुवा' घोषणा गरेको हो।

धनुषाधाम वन संरक्षण क्षेत्रमा आयोजित कार्यक्रमको प्रमुख अतिथिका रूपमा मधेश प्रदेशका मुख्यमन्त्री सतिश कुमार सिंह र वन तथा वातावरण मन्त्री संजय कुमार यादव सहभागी भएका थिए। उनीहरूले संयुक्त रूपमा “धनुष सखुवा” को नामकरण गरे।

मुख्यमन्त्री सिंहले आफ्नो सम्बोधनमा भने, “प्रकृतिले दिएको यस्तो अनुपम कृति हाम्रो गौरव हो। यसलाई संरक्षण गर्नु हाम्रो साझा दायित्व हो। 'धनुष सखुवा' केवल रूख मात्र नभई, पर्यावरण, पर्यटन र संस्कृतिको प्रतीक हो।”

वनमन्त्री यादवले सखुवालाई धनुषाको पर्यावरणीय चिनारीको रूपमा विकास गरिने प्रतिबद्धता व्यक्त गर्दै भने, “सरकार संरक्षण र प्रवर्द्धनमा पूर्ण प्रतिबद्ध छ।”

सखुवाको रूखमा हिन्दू धर्मावलम्बीहरुको अराध्य देउता   गणेशजीको आकृतिमा देखिन्छ, जसले यसको आध्यात्मिक र सांस्कृतिक महत्व झन् बढाएको छ। कार्यक्रममा वृक्षारोपण पनि गरिएको थियो।

स्थानिय बासिन्दा, समाजसेवी, विभिन्न समूह तथा समुदायका अगुवाहरूले वृक्ष संरक्षणमा संकल्प लिँदै “धनुष सखुवा”लाई “धनुषाको हरित धरोहर”को रूपमा सम्मानित गरे।

कार्यक्रममा जनकपुरधाम डिभिजन वन कार्यालयका प्रमुख विनोद सिंह, धनुषाधाम सब-डिभिजन वन कार्यालयका प्रमुख शंकर नारायण झा, वन संरक्षण परिसरका सचिव सत्यनारायण यादवलगायत वन विज्ञ, जनप्रतिनिधि, विद्यार्थी, सञ्चारकर्मी र स्थानीयको उल्लेखनीय उपस्थिति रहेको थियो।

यो सखुवा रूख अब न केवल पर्यावरणीय सम्पदा, तर धार्मिक, सांस्कृतिक र पर्यटनको सम्भावनालाई उजागर गर्ने एक महत्त्वपूर्ण धरोहरका रूपमा स्थापित भएको छ।