साँसद खगेन्द्र सुनारको महिलासँग जोडिएको अडियो लिक भएपछि रास्वपामा हलचल (अडियोसहित)

न्यूज ब्युरो, जनकपुरधाम । राष्ट्रिय स्वतन्त्र पार्टी (रास्वपा) का सांसद खगेन्द्र सुनारसँग जोडिएको भनिएको विवादास्पद अडियो सार्वजनिक भएपछि राजनीतिक वृत्तदेखि सामाजिक सञ्जालसम्म चर्चा चुलिएको छ ।

‘जनआस्था साप्ताहिक’ ले सार्वजनिक गरेको भनिएको उक्त अडियोमा एक महिलालाई धम्की दिएको, रकम मागेको र अश्लील भाषामा गालीगलौज गरेको आरोप उल्लेख छ ।

सार्वजनिक विवरणअनुसार, अडियोमा सुनिने आवाज सुनारकै भएको दाबी गरिएको छ । संवादमा महिलामाथि दबाब सिर्जना गर्ने, रकम जुटाउन ताकेता गर्ने तथा गम्भीर प्रकृतिका धम्की दिने अभिव्यक्ति सुनिने बताइएको छ । यद्यपि, अडियोको प्रामाणिकता र आवाजको पहिचान स्वतन्त्र प्राविधिक परीक्षणबाट पुष्टि भएको जानकारी उपलब्ध छैन ।

अडियोमा महिलाले आफूलाई कुटपिट गरिएको, मानसिक यातना दिइएको र नग्न भिडियो बनाइएको भन्दै गुनासो गरेको सुनिने दाबी गरिएको छ ।

यस प्रकरणसँगै सुनारको भनिएको वित्तीय कारोबारबारे पनि प्रश्न उठाइएको छ । ‘जनआस्था साप्ताहिक’ ले अडियोसँगै विभिन्न बैंकमा भएको भनिएको कारोबारको विवरण सार्वजनिक गरेको उल्लेख छ ।

घटनाबारे सामाजिक सञ्जालमा विभिन्न प्रतिक्रिया आइरहेका छन् । केही प्रयोगकर्ताले निष्पक्ष छानबिन गरी दोषी देखिए कानुनी कारबाही गर्नुपर्ने माग गरेका छन् भने अडियोको प्रामाणिकता पुष्टि हुनुपर्ने धारणा पनि व्यक्त भएका छन् ।

यस प्रकरणले रास्वपाभित्र समेत दबाब सिर्जना गरेको बताइएको छ । पार्टीका नेता तथा कार्यकर्ताबाट यस विषयमा जवाफदेहिता र आवश्यक कदमबारे प्रश्न उठाइएको विवरण सार्वजनिक भएका छन् ।

गम्भीर आरोप सार्वजनिक भए पनि सुनारले अहिलेसम्म कुनै प्रतिक्रिया जनाएका छैनन् ।

अडियोमा सुनिने आवाज कसको हो ? संवादको वास्तविक सन्दर्भ के हो ? र सार्वजनिक गरिएका आरोपबारे सम्बन्धित निकायले निष्पक्ष छानबिन गर्छन् कि गर्दैनन् ? भनेर प्रश्न समेत उठेको छ ।