जनकपुर सहित धनुषाको यी ठाउँहरुमा ७ दिन माछा, मासु र दारु बन्द

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुर सहित धनुषा जिल्लाको विभिन्न स्थानमा ७ दिन माछा, मासु र मदिराजन्य वस्तुको विक्री वितरण तथा सेवन निषेधको निर्देशन गरिएको छ ।

जिल्ला प्रशासन कार्यालय धनुषाले शुक्रबार एक सूचना जारी गर्दै मिथिला माध्यमिकी परिक्रमालाई मध्यनजर गर्दै सुरुदेखि अन्तिमसम्ममा धनुषामा पर्ने स्थानहरुमा माछा, मासु, मदिरा निषेध गर्ने भनिएको छ ।

जसको लागि भोली शनिबार फागुन २९ गतेदेखि सुरु हुने १५ दिने परिक्रमाको क्रममा सुरु दिन जनकपुरको हनुमानगढी एरियामा माँस, मदिरा निषेध गर्ने स्थानीय प्रशासनले निर्देशन जारी गरेको हो ।

यस्तै, आगामी चैत्त ८ गते आईतबार धनुषाको धनुषाधाम नगरपालिका वडा नम्बर ५ पर्वता विश्रामस्थलमा पनि निषेध गरिएको छ । पर्वतामा परिक्रमाको धार्मिक लस्कर सहित साधुसन्तहरुले विश्राम लिने भएकोले माछा, मासु र मदिरा बन्द गर्ने निर्णय गरेको हो ।

चैत्त ९ गते सोमबार धनुषाधाम, चैत्त १० गते सबैला नगरपालिकको सप्तपोखर (सतोषर), ११ गते बुधबार औरहीमा माँस, मदिरा बन्द गर्ने भनिएको छ ।

यसका साथै, जनकपुरमा भने पुनः चैत्त १४ गते परिक्रमाको धार्मिक लस्कर आउने दिन र अन्तरगृह परिक्रमाको दिन चैत्त १५ गते बन्द गर्नुपर्ने भनिएको छ ।

स्थानीय प्रशासनले तोकिएको सो क्षेत्रहरुमा २४ घण्टा अगावै पूर्ण रुपमा माँस, मदिरा, माछाजन्य वस्तुहरु निषेध गर्न भनिएको हो । यसको लागि धनुषा प्रहरीले समेत निगरानी गर्ने भएको छ ।

नेपालको सबभन्दा ठुलो धार्मिक पदयात्राको लागि नेपाल र छिमेकी मुलुक भारतसम्म जाने परिक्रमाको धार्मिक लस्करलाई मध्यनजर गर्दै माँस,मदिरा सो दिनहरुमा निषेध गरिएको हो ।

परिक्रमा सडकमा पर्ने यस्ता पसलहरुमा समेत प्रहरीले निगरानी गरिने जनाइएको छ ।