भू-माफियालाई बचाउन मालपोतका हाकिमले गरे कागजात गायब

न्यूज ब्यूरो, वीरगँज । प्रदेश नम्बर २ को आर्थिक नगरी भनेर चिनिने वीरगँज स्थित मालापोत कार्यालयका हाकिमले सरकारी कागजात गायब गरेको आरोप लगाइएको छ ।

वीरगञ्ज महानगरपालिका वडा नम्बर २ को छपकैयास्थित श्रीराम कोलोनीको जग्गा ठगी प्रकरणका मुख्य आरोपी प्रेम जाटियालाई जोगाउँन भुमिसुधार तथा मालपोत कार्यालय वीरगञ्जका कर्मचारी सक्रिय भएको बताइएको छ ।

प्रहरी हिरासतमा रहेका जाटियालाई जोगाउँन भूमिसुधार तथा मालपोत कार्यालय वीरगञ्जका प्रमुख कुमुद तिवारीले आवश्यक कागजहरु लुकाएको बुझिएको छ ।

मुद्दाको अनुसन्धानका लागि प्रहरीले मालपोत कार्यालयसँग माग गरिएको कागजातहरु प्रमुख तिवारीको निर्देशनमा लुकाइएको प्रहरी स्रोतले जनाएको छ ।

स्रोत अनुसार जिल्ला प्रहरी कार्यालय पर्साले अनुसन्धानका लागि मालोपोत कार्यालय वीरगञ्जसँग प्रेम जाटिया सम्बन्धि कागजातहरु पटक(पटक माग गरेपनि प्रमुख तिवारीले उपलब्ध गराएका थिएनन् ।

आजित भएर जिल्ला प्रहरी कार्यालय पर्साले मालोपोत कार्यालयमा छापामारी गरेर कागजातहरु ल्याउँनु परेको थियो ।

कागजात लिने क्रममा कार्यालयबाट आवश्यक केही कागजपत्र गायब पारिएको प्रहरीले दाबी गरेको छ ।

पर्साका प्रहरी निरीक्षक वेल बहादुर पाण्डे अनुसार भूमिसुधार तथा मालपोत कार्यालयबाट कागजातहरू पठाउन ढिलो गरेपछि प्रहरी परिचालन गर्नुपरेको र सो क्रममा भूमिसुधार तथा मालपोत कार्यालयका प्रमुख कुमुद तिवारी र केही कर्मचारीहरूले यसअघि नै आवश्यक कागजातहरू गायब पारेका थिए ।

२०६० सालसम्म श्रीराम कोलोनीको १७ वटा कित्तामा साबिक जग्गाधनी गोपाल अग्रवालको नाममा रहँदा मोही थियो । कित्ता नम्बर ६० को जग्गामध्ये ७ कट्ठा जग्गा खरीद–बिक्री हुँदा २०६२ सालमा अर्को कित्ता बनाएर मोही लुकाइएको थियो ।

मोही भएको जग्गाबाट मोहीवालाहरूको भाग नछुट्याएर जग्गा बिक्री गरेको कारण अहिले यससम्बन्धी अनुसन्धान भएको र सो कुराको पुष्टि भएको हो ।

कित्ता नम्बर ६० बाट कित्ताकाट गरी कित्ता नम्बर ३५ कायम गरेको र श्रीराम कोलोनीको नाममा १७ वटा कित्ताबाट ७ कट्ठा जग्गा बिक्री भएको हो । अहिले सो जग्गामा मोहीवालाहरूले दाबी गर्दै मुद्दा दिएपछि घटना सार्वजनिक भएको हो ।

जाटियासँग जग्गा खरीद गर्नेहरूले आफूहरू ठगिएको भनी प्रहरीमा उजूरी गरेपछि जाटियालाई पक्राउ गरिएको हो ।

जाटियासँगै उनकी पत्नी र मोही दाबी गर्नेहरूविरुद्ध पनि प्रहरीले मुद्दा दायर गरेको छ । साबिक जग्गाधनी गोपाल अग्रवाल अहिलेसम्म पक्राउ परेका छैनन् । यात्राडेलीमा समाचार छ ।