अब धनुषा जिल्लाभरि राती ९ बजेदेखि विहान ५ बजेसम्म एण्डको, DJ बजाए प्रहरीले पक्राउ गर्ने

न्यूज ब्यूरो, जनकपुरधाम । प्रदेश नम्बर २ को धनुषा जिल्लाभरिमा अब डिजे वा एण्डको बजाए कारवाही गरिने जिल्ला प्रहरी कार्यालय धनुषाले जनाएको छ ।

मँगलबार स्थानीय प्रशासन र डिजे व्यावसायीहरुको बसेको बैठकबाट राती ९ बजेदेखि विहान ५ बजेसम्म कुनै डिजे वा एण्डको (लाउडस्पीकर) बजाउन नपाउने निर्णय गरेको हो ।

धनुषाका प्रहरी प्रमुख (एसपी) प्रकाश रानाभाटको अध्यक्षतामा बसेको बैठकबाट लाईट, साउण्ड तथा डिजे व्यावसायीहरुको उपस्थितिमा मँगलबारदेखि नै लागू हुने गरी निर्णय कार्यन्वयनको लागि सबै ईलाका प्रहरीमा पत्राचार गरिएको छ ।

डिजे व्यावसायीहरुलसँग स्थानीय प्रशासनको यसअघि पनि पटक पटक डिजे बन्द गराउने निर्णय र सहमति भएपनि लागू भने हुन सकेको थिएनन् । आजको निर्णय पनि के कतिको लागू हुने वा नहुने भनेर शंका समेत गरिएको छ ।

निर्णयमा डिजे व्यावसायीहरुले राती ९ बजेदेखि विहान ५ बजेसम्म ठुलो वा चर्को स्वरमा डिजे वा हर्नहरु नबजाउनेमा सहमति गरेको छ । यी अवधीमा हर्नहरु, डिजे, बक्स सबै पूर्ण रुपमा बन्द गर्ने निर्णय गरिएको हो ।

यस्तै, पुनः विहान ५ बजेदेखि राती ९ बजेसम्म डिजे ठुलो आवाजमा नबजाउने, बढी ध्वनी निस्कने हर्न वा डिजे बजाउँदा छरछिमेकलाई डिस्टर्ब नहुने गरी एकदम सानो साउण्डमा बजाउने भनिएको छ । यस्तै, छरछिमेकबाट गुनासो आए पूर्ण रुपमा बन्द गर्नुपर्ने निर्णयमा सहमति भएको हो ।

कुनै पनि अवसरमा अश्लिल, द्धिअर्थ (दोहोरो अर्थ) लाग्ने प्रकारको गीतहरु नबजाउने वा कुनै कहि पनि कुनै बहानामा आरकेष्ट्रा, नाचहरु नचाउन नपाउने गरी पनि निर्णय भएको हो ।

यसका साथै, प्रहरीमा छरछिमेकीबाट गुनासो प्राप्त भए पश्चात प्रहरीले बन्द गराउन जाँदा सवैले पुर्ण रुपमा सहयोग गर्ने, अन्य जिल्ला तथा बाहिरबाट आउने डिजे बाजा व्यवसायीहरुले समेत निर्णयहरूको पुर्ण रुपमा पालना गर्नुपर्ने भएको छ ।

यी सहमतिको नियमलाई मिचेको अवस्थामा प्रहरीले डिजे बाजा र बाजाबालालाई समेत पक्राउ गरिने चेतावनी समेत दिएको हो ।