मधेशकी मुस्कान खातुनलाई अमेरिकी अवार्ड, भनिन–'यो एसिडको दाग मेरो लागी शक्ति हो'

न्यूज ब्यूरो, जनकपुरधाम । प्रदेश नम्बर २ पर्सा वीरगँजकी एसिड पीडित मुस्कान खातुनले एसिडको दागलाई आफ्नो शक्ति भएको बताएकी छिन् ।

अमेरिकी सरकारले प्रदान गर्दै आएको अन्तर्राष्ट्रिय साहसी महिला (आईडब्ल्यूओसी) पुरस्कार ग्रहणको क्रममा मुस्कानले एसिड आक्रमणबाट बसेको दाग शक्तिको रुपमा रहेको बताइन् ।

उनले भनिन–“यो एसिडको दाग होईन, यो त मेरो लागि शक्ति हो, यसलाई नै शक्तिको प्रतीक बनाएर अगाडी बढनेछु । यही दागको कारण आज मलाई विश्वले चिनेको छ । पीडकले दिएको यो दागलाई अब कमजोरीको रुपमा नभएर शक्तिको रुपमा लिएर अघि बढ्नेछु ।”

एसिड आक्रमणमा परेकी पर्साकी मुस्कान खातुनलाई प्रदान गरिएको औपचारिक घोषणा भर्चुअल कार्यक्रम मार्फत गरिएको छ ।

सोमबार राती आयोजित भर्चुअल कार्यक्रम मार्फत अमेरिकी प्रथम महिला जिल बाइडन र विदेश मन्त्री टोनी ब्लिंकनले मुस्कान खातुनलाई पुरस्कृत गरिएको औपचारिक घोषणा गरेका हुन् ।

अन्तर्राष्ट्रिय साहसी महिला पुरस्कारको औपचारिक घोषणा हुनु अघि पत्रकारसँगको भेटघाटमा मुस्कानले एसिड आक्रमणका कारण अनुहारमा बसेको दागलाई चोटको रुपमा नभएर शक्तिको प्रतीक बनाएर अगाडि बढ्ने बताइन् ।

तेजाब हमला अन्त्यका लागि लक्षित उनको कार्यका लागि अमेरिकी सरकारले अन्तर्राष्ट्रिय साहसी महिला पुरस्कार प्रदान गरेको हो ।

कार्यक्रममा मुस्कानले पुरस्कार व्यक्तिगत रुपमा नभएर सबै नेपालीले प्राप्त गरेको बताइन् । उनले पीडकलाई कडा कारबाही हुनुपर्छ भनेर आवाज उठाउँदा कानुन समेत बनेको भन्दै अमेरिकी सरकारले दिएको पुरस्कार सबैको रहेको बताइन् ।

अमेरिकी राजदूत रेन्डी बेरीले तेजाब हमलासम्बन्धी अपराधीहरूलाई दण्डित गर्न तथा रसायनको बिक्रीलाई नियमन गर्नका लागि अध्यादेश जारी गराउन मुस्कानको महत्त्वपूर्ण भूमिकाको कारण पुरस्कृत गरिएको बताए ।

उनले भने ‘मुस्कानले अपराधीलाई दण्डित गर्न कडा सजायको माग गर्दै उठाएको आवाजले महत्वपूर्ण भूमिका खेलेको छ । भविष्यमा पनि न्यायको लागि यस्तै आवाज उठिरहोस् ।’

शान्ति, न्याय, मानव अधिकार, लैंगिक समानता र महिला सशक्तीकरणको वकालत गर्ने तथा असाधारण साहस तथा नेतृत्व प्रदर्शन गरेका विश्वभरका महिलाहरुलाई अमेरिकाले आईडब्ल्यूओसी पुरस्कारले सम्मान गर्दै आएको छ ।

प्रेम प्रस्ताव अस्वीकार गरेको मुस्कान खातुनलाई २०७६ साल भदौ २० गते शुक्रबारका दिन एक किशोरले उनको अनुहारमा एसिड आक्रमण गरेको थियो ।

सो क्रममा प्रदेश नम्बर २ को सरकारले उनको सबै उपचार खर्च बेहोर्ने जिम्मेवारी उठाएको थियो । विभिन्न तवरबाट आर्थिक सहयोग समेत पाएकी मुस्कानलाई बलिवुडकर्मीहरुले समेत हौसला दिएको थियो ।