११ लाख रुपैयाँ घुस सहित महिला प्रहरी हबल्दार रँगेहात पक्राउ

न्यूज ब्यूरो, काठमान्डौं । अख्तियार दुरुपयोग अनुसन्धान आयोगको टोलीले एक महिला प्रहरीलाई ११ लाख रुपैयाँ घुस सहित रँगेहात पक्राउ गरेको छ ।

आईतबार महानगरीय प्रहरी बृत्त नयाँबानेश्वरमा कार्यरत प्रहरी हबल्दार तारा कुमारी श्रेष्ठलाई अख्तियारको टोलीले ११ लाख रुपैयाँ घुस सहित पक्राउ गरेको हो ।

हबल्दार श्रेष्ठले भन्सार चोरी निकासीको अभियोगमा त्रिभुवन विमानस्थल भन्सार कार्यालय गौचर काठमाडौंले महानगरी प्रहरी बृत्त गौशालाको हिरासतमा राखेको व्यक्तिलाई धरौटीमा छुटाई दिन्छु भनी सेवाग्राहीसँग अतिरिक्त रकम माग गरिरहेको उजुरीको आधारमा उनलाई पक्राउ गरेको हो ।

आईतबार अख्तियार दुरुपयोग अनुसन्धान आयोग, टंगालबाट खटिई गएको टोलीद्वारा प्रहरी हबल्दार तारा कुमारी श्रेष्ठलाई सेवाग्राहीबाट ११ लाख रुपैयाँ अतिरिक्त रकम लिई ओल्ड टाउन क्याफे एण्ड पब रेस्टुरेन्ट चावहिलका संचालक अनिस जोशीलाई राख्न दिएको अवस्थामा पक्राउ गरिएको हो ।

टोलीले होटल सँचालक सहित प्रहरी हबल्दार श्रेष्ठलाई उक्त रकमसहित दुवैलाई काठमान्डौं महानगरपालिका वडा नम्बर ९ स्थित त्रिभुवन विमानस्थल भन्सार कार्यालय गौचर काठमाडौंको कार्यालय प्रवेश गर्ने मुलगेट अगाडिबाट नियन्त्रणमा लिएको जनाइएको छ ।

दुवै जनालाई अहिले अख्तियारको टोलीले नियन्त्रणमा राखेर अनुसन्धान प्रक्रिया अगाडी बढाएको जनाइएको छ ।