जनकपुर यातायात कार्यालयबाट १५ दलाल पक्राउ

न्यूज ब्यूरो, जनकपुरधाम । यातायात कार्यालय जनकपुरबाट आज (बुधबार) १५ जना दलाल (विचौलिया) लाई प्रहरीले पक्राउ गरेको छ ।

जनकपुरधाम उपमहानगरपालिका वडा नं. १४ स्थित रहेको यातायात कार्यालयबाट बुधबार दिउँसो नै १५ जनालाई पक्राउ गरिएको हो । उनीहरुलाई सर्वसाधारणसँग पैसा लिएको आरोपमा पक्राउ गरिएको हो ।

जिल्ला प्रहरी कार्यालय धनुषाका प्रहरी प्रवक्ता एवम् डिएसपी मकेन्द्र मिश्रका अनुसार, पक्राउ गरिएका १५ जनलाई शँकाको आधारमा पक्राउ गरिएको हो ।

यातायात कार्यालयमा जाने सर्वसाधारणहरुबाट रकम लिएर भित्रैबाट काम गराइदिने वापत सक्रिय रहेका १५ जनालाई प्रहरीले गुनासोको आधारमा पक्राउ गरेको हो ।

यातायात कार्यालयमा विचौलिया (दलाल) बिना काम नै नहुने र कर्मचारीले पनि काम नै नगरिदिने जस्ता व्यापाक जनगुनासो बढेपछि सिभिलमा गएका प्रहरीले शँकास्पद उनीहरुलाई पक्राउ गरेको हो ।

उनीहरुलाई बुधबार दिउँसो नै नियन्त्रणमा लिएर जिल्ला प्रहरी कार्यालय धनुषामा राखिएको छ । उनीहरुमाथि अनुसन्धान जारी राख्दै दोषी देखिए कारवाही प्रक्रिया अगाडी बढाउने डिएसपी मिश्रले बताए ।

केही दिन अघि मात्र जनकपुर यातायात कार्यालयमा अख्तियार दुरुपयोग अनुसन्धान आयोगको टोलीले छापामारी गरेपछि अहिलेसम्म नयाँ लाईसेन्सको फाराम भने खुल्ला गरिएको छैनन् ।

नयाँ लाईसेन्स खुल्ला नगरिएको भएपनि बिचौलियाहरुले अन्य कार्यको लागि कर्मचारीलाई मिलाएर सेवाग्राहीहरुबाट रकम उठाउने गरेको भन्दै पक्राउ गरिएको हो ।