अब जनकपुरदेखि अयोध्या ५० मिनेटमै पुगिने, बुद्ध एयरको उडान भर्ने तयारी

न्यूज ब्यूरो, जनकपुरधाम । बुद्ध एयरले अब जनकपुरधामदेखि सीधा भारतको अयोध्यासम्म उडान भर्ने भएको छ । त्यसको लागि बुद्ध एयरले हवाई सेवा सञ्चालनको तयारी सुरु गरेको छ ।

ऐतिहासिक एवम् मिथिला–मधेशको प्राचीन नगरी जनकपुरधामदेखि भारतको अयोध्यासम्म दुई शहरलाई जोड्ने गरी बुद्ध एयरले उडान भर्ने तयारी गरेको हो । यसको लागि बुद्ध एयरले संस्कृति, पर्यटन तथा नागरिक उड्डयन मन्त्रालय र नेपाल नागरिक उड्डयन प्राधिकरणसँग अनुमति मागेको छ ।

त्रेयायुगिन सम्बन्धको नविकरण भन्दै बुद्ध एयरले जनकपुरदेखि अब सीधै भारतको अयोध्यासम्म उडान भर्ने तयारी गरेको छ । सीताकी नगरी जनकपुर र भगवान रामको नगरी प्राचीन शहर अयोध्याबीचको त्रेतायुगिन सम्बन्धलाई यसले नविकरण गर्ने जनाइएको छ ।

त्रेतायुगमा जगत जननी सीता (जानकी) र मर्यादा पुरुषोत्तम रामबीचको वैवाहिक सम्बन्धलाई त्रेतायुगिन सम्बन्ध भन्दै यी दुई शहरलाई पुनः जोडनको लागि बुद्ध एयरले हवाई उडान भर्ने तयारी गरेको हो ।

यसअघि पनि जनकपुरदेखि काठमान्डौंसम्म रात्रीकालिन उडान सुरु गरेको बुद्ध एयरले जनकपुरबाट सीधा अयोध्यासम्म पुरयाउने भएको छ । यसको सहजीकरणका लागि प्रदेश २ सरकारसँग समेत आग्रह गरिएको जनाइएको छ ।

अयोध्या उडानमा उत्तर प्रदेशका मूख्यमन्त्री योगी आदित्यनाथको समेत चासो रहेका कारण अयोध्यातर्फ अनुमति प्राप्त हुने विश्वास कम्पनीको छ ।अयोध्यामा भारतले राम मन्दिर बनिरहेको छ, जनकपुर सीताको माइती शहर हो ।

कम्पनीले यसअघि काठमाडौंबाट वनारासका लागि सिधा उडान गरिरहेको थियो । यो रुटको उडान लकडाउन र प्रतिवन्धपछि झिकिएको थियो । त्यसअघि बुद्धले कलकत्ता उडानमा समेत हात हालेको थियो । यो रुटमा अपेक्षित सफलता प्राप्त भएन । तर, जनकपुर(अयोध्या उडानमा भने पर्याप्त यात्रु पाउने अपेक्षा कम्पनीको छ ।

बुद्ध एयरका अनुसार जनकपुरबाट अयोध्या उडान ५० मिनेटको हुने भएको छ । आन्तरिक तयारी शुरु भएको र अयोध्यामा आन्तरिक विमानस्थलको स्तरोन्नति गरी अन्तर्राष्ट्रिय स्तरको बनाउने काम भइरहेका कारण निकट भविष्यमा यस रुटमा उडान गरिने कम्पनीले जनाएको छ ।

जनकपुर र अयोध्याबीचको भौतिक दूरी ४९३ किलोमीटर छ, जुन सडक मार्गबाट एक दिनभरिको यात्रा हो भने बुद्ध एयरले ५० मिनेटमा अयोध्यासम्म यात्रुलाई पुरयाउने भएको छ ।

कम्पनीले अयोध्यासम्मको भाडादर र कहिलेदेखि उडान भर्ने भनेर निश्चित भइनसकेको जनाइएको छ । प्रदेश सरकारबाट हरियो झण्डी पाएलगतै अयोध्यासम्मको उडान भर्ने तयारी गरिएको हो ।