प्रदेश २ः पोखरी खन्दै गर्दा पौराणिक र प्राचीन मूर्ति भेटियो !

न्यूज ब्यूरो, जनकपुरधाम । प्रदेश नम्बरमा पोखरी खन्दै गर्दा पौराणिक (परापूर्वकालीन) एतिहासिक मूर्ति फेला परेको छ ।

प्रदेश नम्बर २ को बारा जिल्लामा आज (शनिबार) ऐतिहासिक मूर्ति फेला परेको हो । बारा जिल्लाको सिमरौनगढ नगरपालिकाको वडा नम्बर ४ मा पोखरी खन्दै गर्दा भगवान विष्णुको पौराणिक मूर्ति भेटिएको जिल्ला प्रहरी कार्यालय बाराले जनाएको छ ।

शनिबार साँझ ५ बजेतर्फ वडा नम्बर ४ हरिहरपुर स्थित बस्ने बर्ष ५० को किसुन्द्र महतोको खेतमा पोखरी खनिरहेको अवस्थामा सो एतिहासिक मूर्ति फेला परेको प्रहरीले जनाएको छ ।

जेसिबीले पोखरी खनिरहेको अवस्थामा जमिनको माथिल्लो तहदेखि करिब १० फिट मुनिसम्म माटो खनेपछि सो मूर्ति देखिएको थियो । मूर्ति देखिएलगत्तै मोटो सँख्यामा स्थानीयहरु ओर्लेको थियो । त्यसपछि प्रहरीलाई पनि खवर गरेको थियो ।

भेटाएको मूर्तिको लम्बाई करिब ७ फिटसम्म रहेको प्रहरीले जनाएको छ । ४ फिट चौडाई र कालो रँगको प्राचीन मूर्ति फेला परेको जिल्ला प्रहरी कार्यालय बाराले जनाएको छ । सो मूर्ति हिन्दु धर्मावलम्बीहरुको देवता भगवान विष्णुको रहेको जनाइएको छ । मूर्ति ढुँगाको रहेको छ ।

मूर्ति भेटाएको खवर पाएलगत्तै ईलाका प्रहरी कार्यालय सिमरौनगढका प्रहरी नीरिक्षक दिपक सुवेदीको नेतृत्वमा गएको प्रहरी टोलीले सो स्थानको मुचुल्का उठाएर सो मूर्तिलाई वडाध्यक्षको रोहबरमा राखिएको हो ।

मूर्ति भेटिएपछि स्थानीय जनप्रतिनीधिको रोहबरमा वडा नम्बर ४ स्थित रहेको महादेव मन्दिरको प्राँगनमा मूर्तिलाई सुरक्षित साथ राखिएको हो ।