जनकपुरः मामाले गरे भान्जालाई अपहरण, प्रहरीद्धारा मामा सार्वजनिक

न्यूज ब्यूरो, जनकपुरधाम । जनकपुरमा एक बालकको उनकै मामाले अपहरण गरी फिरौती माग्दा प्रहरीले पक्राउ गरी सार्वजनिक गरेको छ ।

धनुषाको नगराईन नगरपालिका वडा नम्बर ६ लगमा टोल बस्ने स्थानीय रमेश दासको छोरा बर्ष ७ को चन्दन दासलाई शनिबार अपहरण गरी उनको आमासँग १ करोड रुपैयाँ माग्दा प्रहरीले मामालाई पक्राउ गरी सार्वजनिक गरेको छ ।

जिल्ला प्रहरी कार्यालय धनुषाले आज पत्रकार सम्मेलन गरी महोत्तरीको पिपरा गाउँपालिका वडा नम्बर ७ बस्ने तथा हाल जनकपुरधाम उपमहानगरपालिका वडा नम्बर ७ कटैयाचौरी बस्दै आएका नातामा मामा पर्ने बर्ष २० का रामरतन दास भन्ने लक्ष्मेश्वर कुमार दासलाई पक्राउ गरी सार्वजनिक गरेको हो ।

शनिबार दिउँसो करिब १ बजे बालक चन्दन आफ्नै घरबाट हराइरहेको र फोन गरी १ करोड रुपैयाँ फिरौती मागिरहेको आधारमा प्रहरीलाई जानकारी गराएपछि प्रहरी एक्सनमा आएको थियो । त्यसपछि सीमा प्रहरी जटही र प्रदेश प्रहरी कार्यालयको सँयुक्त टोलीले बालक दासलाई ७ घण्टापछि जनकपुरकै कटैयाचौरीबाट सकुशल उद्धार गरेको थियो ।

साँझ ५ बजेको समयमा आरोपित दासले बालक चन्दन दासकी आमा (नातामा दिदी पर्ने) लाई फोन गरी १ करोड रुपैयाँ फिरौती मागेको थियो । त्यसपछि प्रदेश प्रहरी कार्यालय जनकपुरबाट समेत विशेष टोली परिचालन भई खोत तलास गर्दै जाँदा राती ८ः३० बजेको समयमा जिल्ला महोत्तरी साबिक दनौली वडा नम्बर ७ परिवर्तित पिपरा गाउँपालिका वडा नम्बर ७ घर भई हाल जिल्ला धनुषा जनकपुर उप–महानगरपालिका वडा नम्बर ७ कटैयाचौरी स्थित सरोज ठाकुरको घरमा डेरा गरी बस्ने राम रतन दासलाई पक्राउ गरेको हो ।

दासले आफ्नै कोठामा बन्धक बनाई राखिएको अवस्थामा सकुसल उद्दार गरिएको र फोन गरी फिरौती माग गर्ने नाबालकको मामा नाता पर्ने दासलाई पक्राउ गरी सार्वजनिक गर्दै मुद्दा चलाउने तयारी भएको हो ।