सरस्वतिको मूर्ति सेलाउन (भँसाउन) गएका एक बालकको मृत्यू

न्यूज ब्यूरो, जलेश्वर । प्रदेश नम्बर २ को महोत्तरीमा सरस्वति पूजा सम्पन्नपछि मूर्ति सेलाउन (भँसाउनु, विर्सजन) गएका एक बालकको मृत्यू भएको छ ।

ट्रयाक्टरमा मूर्ति लादेर विर्सन गर्न पोखरी जाँदै गरेको बेला महोत्तरीको बलबा नगरपालिका वडा म्बर ८ बनौटा टोलका एक बालकको सोही ट्रयाक्टरमा किचिएर मृत्यू भएको प्रहरीले जनाएको छ ।

स्थानीय कैलाश यादवका ८ बर्षिय छोरा शिवमकुमार यादवको ट्याक्टरले किचेर मृत्यु भएको जिल्ला प्रहरी कार्यालय महोत्तरीले जनाएको छ । उनको बुधबार दिउँसो किचिएर मृत्यू भएको प्रहरीले जनाएको छ ।

सरस्वतीको प्रतिमा सेलाउन गएको ट्याक्टर ब्याक गर्न लाग्दा यादवको किचिएर मृत्यु भएको महोत्तरीका प्रहरी उपरीक्षक टिकाबहादुर केसीले जानकारी दिए । उनका अनुसार दुर्घटना पश्चात प्रादेशिक अस्पतालमा बालकलाई पठाइएकोमा चिकित्सकले मृत घोषणा गरेका थिए ।

ट्र्याक्टर चालक सोही स्थानका १४ वर्षीय बालक रहेको उनको भनाइ छ । सरस्वति पूजा सम्पन्न गरेपछि मूर्ति सेलाउने परम्परा रहिआएको भन्दै सोही क्रममा मूर्ति सेलाउन ट्रयाक्टरमा मूर्ति र डिजे सहित लादेर पोखरी जाँदै गरेको अवस्था दुर्घटना भएको बुझिएको छ ।

सोही ठाउँ बस्ने ध्रुव कुमार महतोको अन टेस्ट ट्रयाक्टरले किच्दा बालक गम्भीर घाइते भएका थिए । गम्भीर अवस्थाको बालककोे उपचारको क्रममा दिउँसो ३ बजेतिर प्रादेशिक अस्पताल जनकपुरमा निधन भएको जिल्ला प्रहरी कार्यालय महोत्तरीले जनाएको छ ।

बालकको शव अहिले पोष्टमार्टमका लागि प्रादेशिक अस्पताल जनकपुरधाममा राखिएको र घटना सम्बन्धमा थप अनुसन्धान भइरहेको एसपी केसीले बताए ।

प्रत्येक वर्ष विभिन्न उत्सवको बेला मूर्ति सेलाउन गएको बेला दुर्घटना घटना हुँदै आएको छ । प्रदेश नम्बर २ मा सिरहा जिल्ला प्रशासनले बालबालिकाहरुलाई मूर्ति बिर्सजनमा नलैजान निर्देशन जारी गरेपनि बाँकीका जिल्लाहरुमा भने प्रशासनले खासै चासो देखाएनन् ।

विद्यालयहरु सहित चोक, चोराहामा सरस्वतिको मूर्ति बनाएर पूजाआजा गरिन्छ । मूर्ति विर्सजनको बेला विभिन्न ठाउँमा कुरिती झैं रक्सी सेवन गरी मूर्ति विर्सजन गर्न गएको बेला डुबेरै कैयौंको मृत्यू भएको घटनाको समाचारहरु आएको थियो ।