प्रदेश २ का पनि मन्त्रीहरुको सशस्त्र सुरक्षा खोसियो, शंकामा आकस्मिक बैठक बोलाइयो !

न्यूज ब्यूरो, जनकपुरधाम । प्रदेश नम्बर २ को सरकारको मन्त्रीहरुको लागि खटाइएको सशस्त्र सुरक्षा विहिबार खोसिएको छ ।

संघीय नेपालको २ नम्बर प्रदेश सहित ७ वटै प्रदेशको सुरक्षामा खटेका सशस्त्र प्रहरीको सुरक्षालाई हटाइको छ । अँगरक्षक (गार्ड) बनेर सुरक्षा दिरहेका सशस्त्र प्रहरी एकाएक हटाएपछि मन्त्रीमण्डलमा शंका उपशंका छाएको छ ।

सशस्त्र प्रहरीका केन्द्रीय प्रवक्ता डीआइजी राजु अर्यालका अनुसार फौजको नयाँ कार्यविधिअनुसार प्रदेशका मन्त्रीहरुको सुरक्षामा खटिएका सशस्त्र प्रहरीलाई फिर्ता बोलाएको हो । तर, मन्त्रीहरुको सुरक्षा हटाएपछि प्रदेश सरकार पनि विघटन गर्ने शंका उत्तिकै उब्जीएको बुझिएको छ ।

प्रदेश २ सरकारका मन्त्रीहरु लागि मात्रै करिब ३२ जना सशस्त्र प्रहरीको वरिष्ठ हवल्दार र हवल्दार खटिएका छन् । प्रदेश सरकारका अरु मन्त्रीहरुलाई २–२ जना सशस्त्र प्रहरी र आन्तरिक मामिला तथा कानुनमन्त्रीलाई पछुवासहित ८ जना सशस्त्र प्रहरी खटाइएको थियो ।

‘सशस्त्र प्रहरीको नयाँ कार्यविधिमा प्रदेशका मन्त्रीहरुको सुरक्षामा सशस्त्र प्रहरी नखटाउने उल्लेख गरिएको छ,’ प्रवक्ता अर्यालले भने, ‘त्यही प्रावधानअनुसार प्रदेशका मन्त्रीको सुरक्षामा खटिएका सशस्त्र प्रहरीहरुलाई फिर्ता बोलाइएको हो ।’– डिआईजी अर्यालले भने ।

अंगरक्षक र सुरक्षाबाट सशस्त्र प्रहरी झिकिएको प्रदेश २ सरकारलाई जानकारी गराइसकिएको छ । मन्त्रीको अंगरक्षकबाट सशस्त्र प्रहरी झिकिएपछि प्रदेश २ को आन्तरिक मामिला तथा कानुनमन्त्री ज्ञानेन्द्र कुमार यादवले बिहीबार अपरान्ह आकस्मिक सुरक्षा बैठक बोलाएका छन् ।

बद्लिँदो राजनीति घटनाक्रमलगत्तै प्रदेशका मन्त्रीहरुको सुरक्षाबाट सशस्त्र प्रहरी झिकिएपछि प्रदेश २ सरकारका मन्त्रीहरुमा अर्कै संशय देखिएको छ ।

‘प्रतिनिधिसभा विघटनसँगै प्रदेशसभालाई पनि असफल बनाउने प्रयास भइरहेको बेला मन्त्रीहरुको सुरक्षाबाट सशस्त्र प्रहरीलाई झिक्नुले हामी सशंकित बनेका छौं,’ प्रदेश २ सरकारका एक मन्त्रीले भने,‘अहिलेको अवस्थामा झन् सुरक्षा मजबुत पार्नुपर्नेमा उल्टै फिर्ता बोलाउनु शंकास्पद छ ।’

सशस्त्र प्रहरीका अनुसार शुक्रबारबाट प्रदेश सरकारका मन्त्रीहरुसँग सशस्त्र प्रहरीको सुरक्षा रहने छैन् । प्रदेश सरकारका मन्त्रीहरुलाई नेपाल प्रहरीको सुरक्षा थप्ने तयारी छ ।

---

कान्तीपुरकोसहयोगमा