जनकपुरः प्रचण्ड समूह- प्रहरीबीच झडप, १२ राउण्ड आश्रूग्यास फायर, २ प्रहरी पनि घाईते !

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरमा आज (बिहिबार) प्रचण्ड समूहका नेता कार्यकर्ता र प्रहरी झडप भएको छ ।

जनकपुरको शिवचोकमा प्रहरी र प्रचण्ड पक्षधरबीच झडप भएको जिल्ला प्रहरी कार्यालय धनुषाले जनाएको छ । जिल्ला प्रहरी कार्यालय धनुषाका प्रहरी उपरीक्षक प्रकाश रानाभाटका अनुसार १२ राउण्ड आश्रुग्यास प्रहार गरिएको छ ।

झडपको क्रममा नेकपा प्रचण्ड पक्षधरका नेताकार्यकर्ता गरी १० जनाका घाईते भएका छन् भने २ जना प्रहरी समेत घाईते भएको हो । उपरीक्षक रानाभाटका अनुसार, सबै जनाको उपचार प्रादेशिक अस्पताल जनकपुरमा भइरहेको छ ।

१२ राउण्ड ग्यास छाडेको बताउँदै प्रहरी उपरीक्षक रानाभाटले गोली कति राउण्ड चलाएको भनेर यकिन नभएको बताउँदै जानकारी आउन बाँकी रहेको जनाए ।

सो क्रममा नेकपामा नेता एवम् पूर्व स्थानीय विकासमन्त्री रामचन्द्र झा समेत घाईते भएको जनाएको छ । उनको पनि उपचार प्रादेशिक अस्पताल जनकपुरमा भइरहेको छ । जनकपुरको शिवचोकमा प्रचण्ड समूह र केपी ओली समूहबीच नारा लगाउँदै झडप भएको थियो ।

प्रचण्डपक्षधरबाट बिरजु विराजी, रुपेश मण्डल, रुपेश विराजी, प्रदीप साह, सुरेश कापर, शिव कुमार गोईत, उमेश कुमार साह, रँजीत पाण्डे, अपराजय मण्डल, कारीराम यादव लगायत एक दर्जन जति नेता कार्यकर्ता घाईते भएका हुन् ।

यसबारे विस्तृत आउन बाँकी छ ।