प्रदेश २ः अटो रिक्साले ठक्कर दिँदा एकजनाको घटनास्थलमै मृत्यू !

न्यूज ब्यूरो, राजविराज । प्रदेश नम्बर २ को सप्तरीमा अटो रिक्साले ठक्कर दिएपछि एक जनाको घटनास्थलमै मृत्यू भएको छ ।

पूर्व–पश्चिम राजमार्गअन्तर्गत सप्तरीको कञ्चनरुप नगरपालिकामा दुर्घटनामा परी एक पैदल यात्रीको आईतबार मृत्यु भएको हो । मृत्यु हुनेमा पैदल यात्री हनुमाननगर कङ्कालिनी नगरपालिका–१२ बस्ने ३६ वर्षीय इसराफिल अली रहेको इलाका प्रहरी कार्यालय कञ्चनपुरले जनाएको छ ।

उत्तरबाट दक्षिणतर्फ जाँदै गरेको स १ ह ८३८ नंको अटो रिक्साले उहाँलाई ठक्कर दिएको थियो । शव परीक्षणका लागि गजेन्द्रनारायण सिंह अस्पताल राजविराजको शवगृहमा राखिएको छ । घटनाबारे अनुसन्धान भइरहेको प्रहरीले जनाएको छ ।

यस्तै, कैलालीमा समेत मोटरसाइकल दुर्घटनामा परी एक युवकको आज मृत्यु भएको छ । धनगढी उपमहानगरपालिका– ६ मटियारीस्थित सडकखण्डमा सुपप्र ०१००९ प ९१७ नम्बरको मोटरसाइकल दुर्घटनामा हुँदा सोही ठाउँका १८ वर्षीय रोहित रानाको मृत्यु भएको जिल्ला प्रहरी कार्यालय कैलालीका प्रहरी नायब उपरीक्षक प्रतिक विष्टले जानकारी दिए ।

रानाको उपचारका क्रममा सेती प्रादेशिक अस्पतालमा मृत्यु भएको प्रहरी नायब उपरीक्षक विष्टले बताए । तीन जना सवार मोटरसाइकल अनियन्त्रित भई दुर्घटना भएको र दुर्घटनामा परी घाइते भएका धनगढी उपमहानगरपालिका–६ कृष्ण राना र मोटरसाइकल चालक कञ्चनपुरको कृष्णपुर नगरपालिका–७ का मिलेन्द्रसिंह राना घाइते भई उपचार भइरहेको बताइएको छ ।