शितलहर प्रकोपबाट प्रभावित अति विपन्नलाई मात्र राहत : अधिकृत यादव

न्यूज ब्यूरो, जनकपुरधाम । धनुषाको शहिदनगर नगरपालिकाका प्रमुख प्रशासकीय अधिकृत शत्रुध्न यादवले शहिदनगर नगरपालिका शितलहरसँग जुध्न तयार रहेको बताएका छन् ।

प्रत्येक वर्ष प्राकृति प्रकोपझैं आउने शितलहरबाट नगरवासीलाई जोगाउन राहत वितरणको तयारी अन्तिम चरणमा पुगेको बताउँदै उनले तथ्याँक शुद्धिकरणपछि केही दिनभित्रै राहत समाग्री वितरण गरिने बताए ।

न्यूज ब्यूरोसँगको कुराकानीमा अधिकृत यादवले शहिदनगर नगरपालिकाको ९ वटै वडाबाट राहत उपभोक्ताहरुको नामाबली र सूची आइसकेको जनाउँदै सूचिलाई फिल्टराईज गरी राहत वितरणको कार्य प्रारम्भ गरिने बताए ।

उनले भने, –“प्रत्येक वडाबाट वडा कार्यालयलाई पत्र काटदै राहतको आवश्यकता मात्र भएका परिवार वा व्यक्तिहरुलाई समेटेर नामाबली पठाउन पत्राचार गरेका थियौं । स्थानीय जनप्रतिनीधिलाई पनि पत्राचार गरी आ–आफ्नो वडाबाट जरुरतमन्द व्यक्ति वा परिवारको नामाबली सहित सम्पूर्ण तथ्याँक पठाउन आग्रह गरेका थियौं । तथ्याँक आईसकेको छ , केही सम्पादनपछि राहत वितरण कार्यक्रम प्रारम्भ गर्नेछौं ।”

अधिकृत यादवले अति विपन्नको समेत क्षेत्राधिकार तोकिएको बताउँदै सो बाहेकका जोकोहीलाई पनि राहत प्रदान नगरिने बताए । उनले अति विपन्नको क्षेत्राधिकारभित्र पर्ने व्यक्ति वा परिवारलाई मोटो, न्यानो कपडा राहत स्वरुप प्रदान गरिने बताए ।

यादका अनुसार, अति विपन्न र राहत पाउनको लागि घरबाट कोही वैदेशिक रोजगारीमा गएको नहुनुपर्ने, आर्थिक स्थित अत्यन्तै न्यून भएको, अति आवश्यक र जरुरतमन्द भएको जस्तालाई मात्र राहत दिइने छ । वडाहरुबाट सयौंको नामाबली आएको बताउँदै उनले अन्तिम सूचि अनुमगन गरी फाइनल गर्ने र त्यसपछि मात्र राहत दिइने थपे ।

राहत वितरणको सम्बन्धमा नगर प्रमुख उदय कुमार बरबरियाले पनि वडा स्तरबाट राहत उपभोक्ताहरुको नामावली आइसकेको जनाउँदै अति विपन्नको सूचिमा पर्नेलाई मात्र राहत वितरण गरिने जनाए । उनले अन्य प्रक्रियाहरु तीव्र रुपमा चालिएको बताउँदै राहत वितरणको कार्य शिघ्र नै हुने जनाए ।