जनकपुरका मेयर साहले ५७२ जनालाई दिए जग्गाको लालपूर्जा

न्यूज ब्यूरो, जनकपुरधाम । जनकपुरधाम उपमहानगरपालिकाका मेयर लालकिशोर साहले ५ सय ७२ जना जग्गाधनीलाई लालपूर्जा वितरण गरेका छन् ।

जनकपुरधाम उपमहानगरपालिका वडा नं. २१ का ५७२ जनालाई आईतबार जग्गाधनी प्रमाण पत्र वितरण गरिएको छ । नगर प्रमुख साहले उपमहानगरपालिकाको कुर्थामा आयोजित समारोहमा उहाँहरूलाई जग्गाधनी प्रमाण पत्र वितरण गरेका हुन् ।

वितरण गरिएका जग्गाको नापी कार्य १० वर्षअघि नै भएकोमा स्थानीय विवादका कारण वितरण कार्य अन्योलमा परेको थियो । सो अवसरमा नगरप्रमुख साहले आपसी विवादका कारण जग्गाधनी प्रमाण पत्र नपाउने अवस्था उत्पन्न नगर्न आग्रह गरे ।

ग्रामीण भेगमा इन्च–इन्चको विवाद हुने गरेका कारण जग्गाधनी प्रमाण पत्र वितरण कार्य प्रभावित भएको चर्चा गर्दै उहाँले सामान्य विवाद त्यागी उदार बन्नु आवश्यक रहेको धारणा राखे ।

नापी कार्यालय धनुषाका प्रमुख सुमन मिश्रले आपसी विवादका कारण उत्पन्न हुने असहज अवस्थालाई सहज बनाउन आग्रह समेत गरे ।