जानकी मन्दिर र मडवामा TikTok बनाउनेहरुलाई खोज्दै प्रहरी, कैयौं जोडीलाई समातेर अभिभावकलाई जिम्मा

न्यूज ब्यूरो, जनकपुरधाम । विश्व प्रसिद्ध जानकी मन्दिर र सँगै रहेको विवाह मण्डप (मडवा) मा अश्लिल खाले टिकटक Tiktok Video बनाउने जोडीहरु उपर धनुषा प्रहरीले कडा निगरानी गरेको छ ।

जिल्ला प्रशासन कार्यालय धनुषाले हिन्दु धर्मावलम्बीहरुको आस्थाको केन्द्र जानकी मन्दिर र मडवामा भर्खरका किशोर किशोरीहरुले सार्वजनिक ठाउँमा गर्न नहुने खाले टिकटक भिडियो बनाउन थालेपछि व्यापाक जनगुनासोको आधारमा धनुषा प्रहरी अहिले कडाई गरेको छ ।

सो क्रममा जानकी मन्दिर र मडवामा अश्लिल खाले टिकटक बनाउन जाने किशोर किशोरी तथा युवा युवतिहरुलाई प्रहरीले पक्राउ गरी अभिभावकलाई जिम्मा लगाउने गरेको छ । सँगै रहेको जानकी प्रहरी चौकीले किशोरी किशोरीहरुलाई समातेर उनको अभिभावकलाई जिम्मा लगाउने गरेको बताएको छ ।

न्यूज ब्यूरोसँगको कुराकानीमा जानकी प्रहरी चौकीले जिल्ला प्रहरी कार्यालय धनुषाको आदेश बमोजिम जानकी मन्दिरको प्राँगन र मडवामा अश्लिल खाले टिकटक बनाउनेहरुलाई कारवाही गर्ने गरेको जानकारी दिएको हो ।

“गाउँबाट जनकपुर सहित अन्य विभिन्न जिल्लाबाट जनकपुर आएका युवा युवति सहित किशोर किशोरीहरुले समेत धार्मिक स्थलको लागि अपाच्य हुने खाले टिकटक भिडियो बनाउँदै आएका थिए । हामीले अहिले कडा निगरानी गरेका छौं । एक दर्जनभन्दा बढीलाई त समातेर उनको अभिभावकलाई जिम्मा लगाएका छौं ।”– चौकी ईन्चार्जले भने ।

कलेज र स्कूल छाडेर पढन आएका किशोर किशोरीहरुलाई टिकटकको लत लागेर पढाई समेत बिर्सेको एक व्यापारीले भने । मडवाभित्रै पसल थाप्दै आएका एक व्यावासायीले भने, –“हदै छ, यहाँ त पहिलेको जस्तो रहेनछ अब हौ, ५ रुपैयाँको टिकट कटाउँछ, भित्र पस्छ र यस्तो हर्कतहरु गर्छ की आफैं लाज लागेर आउँछ । कैयौंलाई सम्झाउन पनि खोजेको थिए, तर मानेनन् । अब प्रशासनले नै यीनीहरुलाई तह लगाउँछन् ।”

जानकी प्रहरी चौकीले जानकी मन्दिर परिसर र मडवामा प्रहरी डयूटीमा राखेको छ । सिभिल डे्रेसमा रहेको प्रहरीले साधारण रुपले टिकटक बनाउनेलाई केही पनि नगरी मन्दिरभित्र पाच्य नहुने खाले बनाएको देखेपछि तुरुन्त समाउने गरेको छ । उनीहरुलाई पक्राउ गरी अभिभावकलाई बोलाएर सम्झाई बुझाई गरी जिम्मा लगाउने गरेको छ ।

स्थानीय युवा अगुवा गणेश साहले जानकी मन्दिर र विवाहमण्डप जस्तो धार्मिक र ऐतिहासिक क्षेत्रमा केही किशोर किशोरीहरुले नियोजित ढँगले स्थललाई बदनाम गराउन सार्वजनिक स्थलमै चुम्बन गरेको भिडियोहरु बनाउने गरेको, अश्लिल हर्कतको भिडियो बनाउने गरेको भन्दै त्यस्ता गतिविधिमाथि रोक लगाउन जिल्ला प्रशासन कार्यालय धनुषामा उजुरी दिएको थियो ।

सोही उजुरीमाथि जिल्ला प्रशासन कार्यालय धनुषाले पनि जिल्ला प्रहरी कार्यालय धनुषालाई पत्र लेख्दै जानकी मन्दिर लगायत जनकपुरको धार्मिक क्षेत्रहरुमा बनाइने अश्लिल खालको टिकटक माथि निगरानी गरी कारवाही गर्न आदेश दिएको थियो ।

यता, प्रहरीले अहिले जानकी मन्दिर र विवाहण्डपमा कडाई गरेपछि किशोर किशोरी, युवा युवतिहरुले गँगासागर, नजिकै रहेको भूतनाथ मन्दिर (स्वर्गद्धारी), राम मन्दिर, राजदेवी मन्दिर लगायतको मन्दिरमा गएर उही खाले हर्कत गरिरहेको देखिएको छ ।

यद्यपी, जनकपुरका युवाहरुले यसलाई नाकारात्मक भन्दै धार्मिक स्थलहरुमा टिकटक भिडियोमा पूर्ण बन्देज गर्न माग पनि उठाएका छन् । केही दिन अघि मात्र जानकी मन्दिरमा दुई जोडीले बनाएको एक भिडियो समाजिक सँजालमा भाइरल बनेको थियो । त्यसपछि नागरिक समाजले प्रशासनलाई गुहारेको थियो ।