बलिदानी दिवसमा डा. सिके राउतले विशाल जनप्रदर्शन गर्ने तयारी

न्यूज ब्यूरो, जनकपुरधाम । जनमत पार्टीका राष्ट्रिय अध्यक्ष डा. सिके राउत र उनकै पार्टीबाट अलग भएका कैलाश महतोबीच बलिदानी दिवसमा वैचारिक काउण्टर हुने सम्भावना बढेको छ ।

तराई मधेशमा डा. सिके राउतप्रतिको क्रेज दिनानुदिन बढदै गएको समयमा सोही पार्टीबाट अलग भएका कैलाश महतोले डा. राउतसँगै यसपाली कार्यक्रम गर्न लागेपछि वैचारिक काउण्टरको सम्भावना बढेको हो ।

प्रत्येक वर्ष माघ ५ गते सिरहाको लहानमा मनाउँदै आएको बलिदानी दिवसको क्रममा डा. सिके राउत नेतृत्वको जनमत पार्टीले बलिदानी दिवसको आयोजना लहानमै गरेको छ भने कैलाश महतो नेतृत्वको स्वाधीन मधेश जनअभियानले पनि सोही ठाउँमा कार्यक्रम गरिने तय भएको छ ।

तत्कालीन स्वतन्त्र मधेश गठबंधनको आयोजनामा २०७३ साल माघ ५ गतेको दिन भएको वृहत आमसभामा डा. सी के राउतको प्रमुख आतिथ्तयामा प्रो. कैलाश महतो विशिष्ठ अतिथि रहेका थिए भने यस पाली २०७७ माघ ५ गतेको दिन हुने सोही शहीद श्रद्धांजलीको कार्यक्रम आ–आफ्नै संगठनमा विभाजित भएका दुवै जनाले एक अर्कालाई वैचारिक काउन्टर गर्ने गरी जनताको बाक्लो उपस्थितिको लागि तयारीमा जुटेका छन्।

जनमत पार्टीको तर्फबाट लहान पस्न दुवैतर्फ प्रवेशद्वार बनाईएका छन भने लहानभरि विभिन्न पर्चा पम्फलेट टांसिएका छन् । मधेशभरिकै आफ्ना कार्यकर्ताहरुको उपस्थिति रहने कुरा जनमतले बताउँदै आएको छ भने स्वाधीन मधेश जन अभियानका तर्फबाट पनि विभिन्न गाडीहरुमा साउण्ड प्रचार प्रसार भिरहेको छ । स्वाधीन मधेश जन(अभियानको स्थानीय तहमा संगठन नभए पनि विभिन्न ठाउँमा विभिन्न प्रचार सामग्रीहरु लहान भरि नै लगाईएका छन्।

माघ ५ गते दिनको १२ः०० बजे नै दुवै पार्टी जनमत पार्टी र स्वाधीन मधेश जनअभियानको श्रद्धाञ्जली अर्पण गर्ने कार्यक्रम रहेको छ । डा. राउत समूहको लहानको पशुपति उच्च मा वि. मा कार्यक्रम हुने छ भने कैलाश महतो समूहले ल. ल. कु. मा. वि. को प्राङ्गणमा जम्मा भई शहिद रमेश चोकमा नै सभा गर्ने तय गरेका छन् ।

लहानमा माघ ५ गतेको कार्यक्रमले गर्दा अहिले सुरक्षाको दृष्टिकोणले पनि लहान अहिले उच्च जोखिममा रहेको सुरक्षा श्रोतको भनाई छ।

स्वाधीन मधेश जन-अभियान र जनमत पार्टीका कार्यकर्ताबीच कुनै प्रकारको टकराव हुन नदिन सुरक्षा संयन्त्र लागि पर्ने सम्भावना छ भने दुवै संगठनले आ-आफ्ना यूवा शक्ति देखाउने दाउमा छन् ।