सिरहाः गाँउ नजिकैको वनमा हात्ती पसेपछि स्थानीय त्रसित, अलर्ट भएर बस्न प्रशासनको आग्रह

न्यूज ब्यूरो, सिरहा । सिरहाको मिर्चैया नगरपालिका–९ स्थित वनमा ३ वटा हात्ती आएर बसेपछि आसपासका गाउँका बासिन्दा त्रसित बनेका छन् ।

मिर्चैया–९ रमपुरादेखि करिब १ किलोमिटर उत्तर तथा ननुवा नजिकै रहेको वनमा गएरातिदेखि ३ वटा हात्ती पसेको छ । बस्ती नजिकै रहेको सो वनमा हात्ती पस्दा सिंगो दुई बस्ती नै त्रसित बनेको हो ।

मध्यरातमा नै छिरेको हात्ती बिहान स्थानीयले देखेपछि विहीबार दिनभर हात्ती हेर्नेको भीड लागेको थियो । हात्ती गाउँ नजिकैको जंगलमा पसेको तर, क्षति भने नगरेको वडाध्यक्ष मोहन प्रसाद पोखरेलले बताए ।

हात्ती आएको जानकारी पाएपछि इलाका प्रहरी कार्यालय मिर्चैयाबाट प्रहरी निरीक्षक रामेश्वर पण्डितको कमाण्डमा प्रहरी टोली पनि त्यहाँ पुगेको थियो । तर, प्रहरी टोली हात्ती नधपाइकनै फर्केको छ ।

जंगलतिर भगाउँदा फेरि आउन सक्ने र आएको बाटो तिर डोर्‍याउँदा बास्तीमा उपद्रो गर्न सक्ने भएकाले त्यतिकै छाडेर आउनुपरेको प्रहरी निरीक्षक पण्डितले बताए । हात्ती हेर्न गएका स्थानीयवासीहरुलाई घर पठाइएको र स्थानीयसँग सम्पर्कमा रहेर निगरानी भने राखेको उनले बताए ।

हात्तीलाई नजिस्काएर छाडिदिए आफैं बाटो लाग्ने उनको भनाइ छ । प्रहरीले स्थानीयवासीलाई अलर्ट भएर बस्न आग्रह पनि गरेको छ ।