डा. सिके राउतलाई पनि जसपासँगै आउन राज्यमन्त्री मण्डलको सुझाव

न्यूज ब्यूरो, सिरहा । प्रदेश २ का उद्योग, पर्यटन, वन तथा वातावरण राज्यमन्त्री सुरेश कुमार मण्डलले डा. सिके राउतलाई पनि जनता समाजवादी पार्टीसँगै आउन आग्रह गरेका छन् ।

कल्याणपुर नगरपालिका–९, रुदलपुरमा बुधबार आयोजित धर्मशाला शिलान्यास कार्यक्रमलाई सम्बोधन गर्दै उनले मधेशको रुपान्तरणका लागि उनले मधेशका जनतालाई आफूहरूलाई साथ दिन आह्वान पनि गरे ।

मधेश र देशका लागि सच्चा मनले काम गर्न चाहने पार्टी र व्यक्तिलाई जसपाले स्वागत गर्ने बताउँदै उनले जनमत पार्टीका अध्यक्ष डा. सिके राउतलाई पनि सँगै आउन सुझाव दिए ।

उनले देशमा पछिल्लो समय उत्पन्न राजनीतिक घटनाक्रमप्रति आक्रोशसमेत जनाएका छन् ।यस्तो जिकिर गरेका हुन् । उनले मधेशको उत्थान र समृद्धिका लागि मधेशी जनता पनि एक हुनैपर्ने बताए ।

'काठमाडौं केन्द्रित पुराना पार्टीहरुले मधेशलाई के दिएको छ, त्यो सबैलाई थाहा छ' उनले भने, 'त्यसैले अब मधेशी जनता एक हुनैपर्छ ।ु पुराना पार्टीहरुले मधेशलाई स्वार्थपूर्तिका लागि मात्रै प्रयोग गर्दै आएको उनको आरोप छ ।

तैपनि मधेशी जनता सचेत नहुनु विडम्बनापूर्ण भएको उनले बताए । मधेशी जनता गम्भीर नबनेसम्म मधेशको दुर्गति भइरहने उनको भनाइ छ ।

प्रदेश सरकारले विकासको कार्य गरेपनि बालुवामा पानी खन्याए जस्तो भएको उनले सुनाए । “मधेशका बस्तीहरुको अवस्था यस्तो छ कि, जति काम गर्दा पनि बालुवामा पानी खन्याए जस्तो भएको छ,”– उनले भने ।

प्रदेश २ सरकार यस प्रदेशको उत्थानका लागि हरसम्भव प्रयास गरिरहेको उनको दावी छ । अहिलेसम्म सरकारी एक रुपैयाँको विकासका काम भएको नभएको भन्दै यसपालि यो क्षेत्रमा मेरै मन्त्रालयबाट करिब १५ करोडको काम भइरहेको थपे ।

उनले भने, “तर मलाई सबैभन्दा खुशी यहाँ काम गराउँदा लागेको छ, म खुशी र भावुक पनि छु ।”

प्रधानमन्त्री ओली र राष्ट्रपति विद्या भण्डारीले मिलेमतोमा संसद विघटन गरेर संघीय लोकतान्त्रिक गणतन्त्रको खिल्ली उडाएको उनको आरोप छ ।