प्रदेश २ः पुनः मोटरसाईकलले ठोकेपछि हरिण मरे

न्यूज ब्यूरो, सर्लाही । पूर्व पश्चिम राजमार्ग अन्तर्गतको उप–सडकमा सर्लाहीमा मोटरसाईकलको ठक्करबाट एक हरिणको ज्यान गएको छ ।

गत शनिबार पुस १८ गते मात्र प्रदेश २ कै बारा जिल्ला स्थित पूर्वपश्चिम राजमार्गमै कारको ठक्करबाट एक पाटे बाघको मृत्यू भएको थियो भने त्यसको ३ दिनपछि नै पुनः सोही राजमार्गमा पर्ने लोक सडक खण्डमा हरिण मरेको छ ।

प्रदेश २ सर्लाही जिल्लाको बाग्मती नगरपालिका वडा नं. ३ स्थित नयाँरोड–बरहथवा सडक खण्डमा उत्तरबाट दक्षिणतर्फ जाँदै गरेको प्रदेश १–०२–०४२ प. ४००९ नम्बरको मोटरसाइकलले ठक्कर दिँदा हरिणको घटनास्थलमै मृत्यु भएको जिल्ला प्रहरी कार्यालय सर्लाहीले जनाएको छ ।

प्रहरीका अनुसार, हरिणको मृत्यूसँगै ठक्कर दिने मोटरसाईकलमा सवार दुई जना गम्भिर घाईते भएका छन् । हरिणलाई सोमबार राति ठक्कर दिएपछि मोटरसाइकल पल्टिँदा त्यसका चालक सप्तरीको कन्चनरुप नगरपालिका–११ बस्ने २२ वर्षीय सुनिल थापा सामान्य र पछाडि सवार सर्लाहीको हरिपुर नगरपालिका–१ बस्ने २५ वर्षीय शिव कुमार महतोको टाउको र वायाँ कुममा चोट लागेको छ ।

दुबैको हनुमन्ते अस्पताल बरहथवामा उपचार भइरहेको सर्लाहीका प्रहरी प्रवक्ता मदन कुँवरले जानकारी दिए । यता, इलाका वन कार्यालय मुर्तीयाको टोलीलाई मोटरसाइकल र मृतक हरिण जिम्मा लगाइ पठाइएको कुँवरले बताए ।