आगलागी हुँदा घरसँगै सबै सामान खरानी, बिचल्लीमा पीडित परिवार

न्यूज ब्यूरो, सिरहा । सिरहाको मिर्चैया नगरपालिका–९ स्थित एक बस्तीमा आगलागी भएको छ ।

मिर्चैया–९ स्थित पहाड बस्ती घुर्मीमा सोमबार बिहान आगलागी भएको हो । आगलागीबाट स्थानीय खिल बहादुर सुनुवारको घर जलेर नष्ट भएको छ ।

घरसँगै घरमा रहेका अन्नपातसहित अन्य सम्पूर्ण सरसामान पनि जल्दा उनीहरुको बिचल्ली भएको छ । खाना पकाउने क्रममा एक्कासी चुलोबाट आगो सल्केर आगलागी भएको वडाध्यक्ष मोहन पोखरेलले बताए ।

स्थानीयहरुको सक्रियतामा आगो नियन्त्रण गरिएको उनले जनाए । आगलागीबाट मानवीय क्षति भने नभएको इलाका प्रहरी कार्यालय मिर्चैयाका डिएसपी सन्तुप्रसाद जैसवारले जानकारी दिए ।

दैनिक ज्यालादारीमा निर्भर सुनुवार परिवारको एउटा मात्रै घर थियो । घर जलेपछि उनीहरुलाई रात काट्न पनि बिजोग भएको छ ।

यता, वडाध्यक्ष पोखरेलले पीडित परिवारलाई तत्काल राहत सामाग्री प्रदान गरिएको जनाएका छन् । आफूले चावल, दाल, लुगा लगायतका सामान तथा नगरपालिकाबाट त्रिपाल र कम्बल सहयोग गरिएको उनले बताए ।

आर्थिक रुपले निकै विपन्न सुनुवार परिवारले सबैसँग सहयोगको अपीलसमेत गरेका छन् ।