जसपाको दोस्रो चरणको आन्दोलन घोषणा, मुख्यमन्त्री राउतले समेत नारा लगाउने

न्यूज ब्यूरो, जनकपुरधाम । जनता समाजवादी पार्टी (जसपा) ले तराई मधेश सहित विभिन्न जिल्लाको लागि दोस्रो चरणको आन्दोलनको घोषणा गरेको छ ।

प्रधानमन्त्री केपी शर्मा ओलीले संविधान विपरित प्रतिनीधिसभा भँग गरेको विरोधमा जसपाले जनकपुर सहित विभिन्न ठाउँको लागि दोस्रो चरणको चरणवद्ध आन्दोलन गर्ने तयारी गरेको हो ।

आउँदो पुस २५ गतेदेखि माघ ७ गतेसम्म दुई हप्ते आन्दोलनका कार्यक्रमहरु घोषणा गरिएको छ जसमा जसपाका शिर्ष नेताहरुले समेत प्रदर्शन गर्ने कार्यक्रम रहेको छ ।

सो क्रममा पुस २५ गते प्रदेश नम्बर १ को राजधानी विराटनगरमा हुने प्रदर्शनमा पार्टीका अध्यक्ष उपेन्द्र यादव, बाबुराम भट्टराई र नेता लक्ष्मणलाल कर्ण लगायतले समेत प्रदर्शनमा सहभागी हुने उल्लेख गरिएको छ ।

यस्तै पुस २७ गते प्रदेश नं. २ को आर्थिक नगरी भनेर चिनिने वीँरगँजमा हुने प्रदर्शनको क्रममा प्रदेश नम्बर २ का मुख्यमन्त्री मो. लालबाबू राउत, उपेन्द्र यादव र वृषेशचन्द्र लाल लगायतका नेताहरुले ओलीको कदम विरुद्ध नारावाजी गर्ने कार्यक्रम राखिएको हो ।

सोही दिन जनकपुरमा हुने प्रदर्शनमा राजेन्द्र महतो, रेणु यादव र शरतसिँ भण्डारी लगायतका नेताहरुले अगुवाई सहित प्रदर्शन गर्ने भएको छ ।

यी जिल्लाहरुबाहेक सुर्खेत, विर्तामोड, पोखरा, नेपालगँज, धरान, सिरहा, मलँगवा, कलैया, तौलिहवा सहित सबै जिल्लाको सदरमुकामा माघ ७ गते प्रदर्शन गर्ने कार्यक्रम राखिएको हो ।