मेयरको आक्रोश : हामी सडकमा छौं, ओलीका शाखासन्तान बालुवाटार जाउ

न्यूज ब्यूरो, सिरहा । प्रधानमन्त्री केपी शर्मा ओलीले गरेको संसद विघटनको विरोध चौतर्फी रुपमा भइरहेको छ ।

प्रधानमन्त्रीको कदमले देश दुर्घटनामा पुगेको भन्दै कांग्रेस र जसपा लगायतका दल आन्दोलनमा छन् नै, पार्टी प्रतिगमनको भुमरीमा धकेलिएको भन्दै ओली पक्ष बाहेकका नेकपाकै कार्यकर्ताहरु पनि सडक तताइरहेका छन् ।

ओलीले संसद विघटन गरेपछि पार्टी फुटिसक्यो कि बाँकी छ ? भन्ने प्रश्नको जवाफ नेकपाका नेता कार्यकर्ताहरुको अभिव्यक्तिबाट बुझ्न सकिन्छ । केन्द्रका नेताहरूबीच जूहारी चलिरहँदा स्थानीय स्तरमा समेत यसको राप देखिन थालेको छ ।

स्थानीय तहहरुमा निर्वाचित ओली निकट बाहेकका स्थानीय तह प्रमुखहरूले आन्दोलनको अगुवाई गर्दै आन्दोलनमा उत्रेका छन् । संसद विघटन लगत्तै आइतबार सिरहाको मिर्चैयामा नगरप्रमुख श्रवण यादवको अगुवाईमा प्रदर्शन भयो ।

त्यसलाई निरन्तरता दिँदै मिर्चैयामा आज सोमबार पनि प्रदर्शन भएको छ । प्रदर्शनपछि भएको कोणसभामा मेयर यादवले आफ्नै पार्टीका प्रधानमन्त्रीले देशलाई खाल्डोमा धकेलेको भन्दै सडकमा आउनु परेको बताए ।

आफ्नै पार्टीका सरकारले लोकतान्त्रिक मूल्य र मान्यता तथा संवैधानिक व्यवस्थाकै प्रतिकूल हुने गरी संसद विघटन गरेपछि लज्जा बोध भएको उनको भनाइ छ । देशलाई दुर्घटनामा पुर्याउने प्रधानमन्त्रीको विरोधमा नेता कार्यकर्ताहरुलाई सडकमा आउन उनले आग्रह पनि गरे ।

अझ पनि ओलीको वाहवाही गर्नेहरुलाई देखेर आफूलाई दया लागेको भन्दै उनले आक्रोश व्यक्त गरे । "हामी सडकमा छौं," उनले भने, "ओलीका शाखासन्तान बालुवाटार गए हुन्छ ।"

संसद् विघटन असंवैधानिक भएकाले संसद् पुनर्स्थापना गर्नुपर्ने माग उनले गरे । प्रधानमन्त्री ओलीको सिफारिसमा आइतबार दिउँसो राष्ट्रपति विद्यादेवी भण्डारी संसद् विघटन गर्दै निर्वाचन मिति समेत तोकेकी छन् ।