अब सधै यस्तै देखिनेछ विश्वप्रसिद्ध जनकपुरको 'जानकी मन्दिर'

न्यूज ब्यूरो, जनकपुरधाम । विश्वप्रसिद्ध जनकपुरको जानकी मन्दिरलाई स्थायी रुपमा विद्युतिय सजाबटको लागि भएको सम्झौता अनुसार सौन्दर्यीकरण गरेपछि झिलीमिली भएको छ ।

विश्वमै प्रसिद्ध रहेको प्रदेश नं. २ को अस्थायी राजधानी जनकपुरको पहिचान जगत जननी जानकी मन्दिरललाई थप सौन्दर्यीकरणको दृष्टिकोणले विद्युतियकरण मार्फत सजाबट गरेपछि बेग्लै सौन्दर्य देखिएको छ ।

यसको लागि गैर आवासीय नेपाली संघ (एनआरएन) र जानकी मन्दिर गुठीसँस्थानबीच मन्दिरलाई विद्युतियकरण सजाबटको लागि सम्झौता भएको थियो ।

जानकी मन्दिरलाई विद्युतिय सजाबटको लागि निरन्तर पहलकर्ताको भूमिका निर्वाह गर्दै आएका मनिष झा गैर आवासीय नेपाली संघ र जानकी मन्दिर गुठीबीच गत वि. सं. २०७५ साल असार २५ गते पत्रकार सम्मेलन गरी सम्झौता भएको थियो ।

सम्झौता अनुसार जानकी मन्दिरको विभिन्न कुना काप्चामा पनि रँगीन लाईटहरु जडान गरिएपछि अति मनमोहक देखिएको छ । विशेष गरी रातीको समयमा जानकी मन्दिर मनमोहक र सौन्दर्य देखिन थालेको छ ।

सो क्रममा मन्दिरको चारै तर्फ सहित भित्री भागमा पनि विभिन्न रँगको रँगीन लाईट जडान गरिएको हो । जसले रातीमा एउटै मन्दिरमा विभिन्न प्रकारको लाईट जलेपछि झन आकर्षक देखिन थालेको हो ।

गैर आवासीय नेपाली संघका सँस्थापक अध्यक्ष डा. उपेन्द्र महतोको विशेष उपस्थितिमा जनकपुर उपमहानगरपालिकाका मेयर लालकिशोर साह र जानकी मन्दिरका महन्थ राम तपेश्वर दास बैष्णवको समेत उपस्थितिमा सम्झौता पत्रमा हस्ताक्षर गर्ने कार्यक्रम भनिएपछि सो समयमा सम्झौता पत्रमा हस्ताक्षर भने गैर आवासीय नेपाली संघका वर्तमान अध्यक्ष भवन भट्ट र जानकी मन्दिरका महन्थ राम तपेश्वर दासबीच भएको बुझिएको छ ।

मन्दिरको विद्युतीयकरण परियोजनाको लागि गैर आवासीय नेपाली संघका सल्लाहकारद्धय रामेश्वर साह र सुभाष अधिकारी स्वयंम उपस्थिति भई मन्दिर सौन्दर्यीकरणको लागि सल्लाह दिएका थिए ।

परियोजनाका लागि अनुमानित लागत ३ करोड ५० लाख रहेको जानकारी गराइएको छ ।