अझै खुलेन लाईसेन्सको फाराम, कहिलेदेखि खुल्ने ?

न्यूज ब्यूरो, जनकपुरधाम । गत बर्षको चैत्तदेखि नै बन्द गरिएको नयाँ सवारी चालक अनुमति पत्र (लाईसेन्स) को अनलाईन फाराम अझै सरकारले खुल्ला गरेको छैनन् ।

कोभिड १९ (कोरोना भाइरस) को कारण महिनौदेखि बन्द गरिएको नयाँ लाईसेन्सको फाराम केन्द्र सरकारले अनुमति नदिएपछि खुल्न सकेको छ्रैनन् । बुधबार यातायात व्यवस्था विभागले एक सूचना प्रकाशित गरी देशको सातै प्रदेशबाट खोल्न चाहने प्रदेशले केन्द्र सरकारसँग समन्वय गरी खोल्न पाउने भन्दै सम्पर्क व्यक्तिहरुको सम्पर्क नम्बर जारी गरेको हो ।

भौतिक पूर्वाधार तथा यातायात मन्त्रालय, यातायात व्यवस्था विभागले सूचना प्रकाशित गर्दै ईच्छुक प्रदेशले खोल्न सकिने उल्लेख गरेको छ । प्रदेशको भौतिक पूर्वाधार मन्त्रालय र त्यस अन्तर्गत कार्यालयको माग अनुसार चालक अनुमतिपत्रको परीक्षा र अनलाइन फारम खुला हुने जनाइएको छ ।

सबै प्रदेश सहित देशभरिको यातायात कार्यालयको सर्भर केन्द्रीय कार्यालयमा रहेको भन्दै खोल्न चाहने प्रदेशले केन्द्रसँग समन्वय गरी खोल्न सक्ने बताएको छ । यद्यपी, अहिलेसम्म अनलाईन फाराम भने कुनै पनि प्रदेशले खुल्ला गरेको छैनन् ।

विगत ८ महिनादेखि निरन्तर बन्द रहेको लाईसेन्सको फाराम नखुल्दा आम सेवाग्राही मार्कामा परेका छन् । जबकी नयाँ लाईसेन्स बाहेकका अन्य कार्यहरु यातायात कार्र्यालयमा भइरहेको छ ।