जनकपुरमा श्रीमानले गरे श्रीमतिमाथि एसिड प्रहार !

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरमा एक महिलामाथि एसिड प्रहार गरिएको छ ।

जनकपुरधाम उपमहानगरपालिका वडा नम्बर २० देवपुरा रुपैठा बस्ने बर्ष २७ का सँजीव साहले आफ्नै श्रीमति आरती साह उपर एसिड प्रहार गरेको जिल्ला प्रहरी कार्यालय धनुषाले जनाएको छ ।

जिल्ला प्रहरी कार्यालय धनुषाका प्रहरी प्रवक्ता एवम् डिएसपी मकेन्द्र मिश्रका अनुसार, आरतीसँग मनमुटाव भएको भन्दै शनिबार दिपावलीकै दिन बिहान करिब ९ः३० बजे आरतीमाथि एसिड प्रहार गरेको हो । अहिले सँजीवलाई उनकै घरबाट पक्राउ गरी अनुसन्धान थालिएको हो ।

दुवै जनाबीच मनमुटावका कारण उपमहानगरपालिका वडा नं. ७ जानकी नगरमा घरमै बसिरहेकी २६ वर्षीया आरतीमाथि एसिड प्रहार गरी भागेको स्थानीयहरुलाई उदृत गर्दै प्रहरीले जनाएको छ । स्थानीयहरुले सँजीव नै एसिड प्रहार गरेको भनेपछि उनलाई पक्राउ गरी अनुसन्धान थालिएको बताईएको छ ।

तीनवर्ष अघि बैवाहिक बन्धनमा बाँधिएको दुवै जनाबीच विवाहको केही दिनपछि मनमुटाव सुरु भएको बताईन्छ । मनमुटावपछि आरती जनकपुरको पेठिया बजारमा तरकारीको व्यापार गर्दै जीवीका चलाउँदै आएकी थिईन् ।

एसिड प्रहारबाट आरतीको निधार र छातीको केहि भाग जलेको छ । उनको उपचार पेठिया बजार नकिजै रहेको जानकी हेल्थकेयरमा भइरहेको प्रहरीले जनाएको छ ।