सिरहामा एकैपटक ५८ डोम परिवारको पक्की घर निर्माण थालियो

न्यूज ब्यूरो, सिरहा । सिरहामा एकैपटक ५८ डोम परिवारको आवास निर्माणको काम सुरु भएको छ ।

प्रदेश सरकारको जनता आवास कार्यक्रम अन्तर्गत सिरहा निर्वाचन क्षेत्र नम्बर ४ ‘ख’का ५८ डोम परिवारको पक्की घरको निर्माण सुरु भएको हो ।

कल्याणपुर नगरपालिका ३ मा घर निर्माणका लागि आइतबार एक कार्यक्रमबीच प्रदेश २ उधोग, पर्यटन, वन तथा वातावरण राज्यमन्त्री सुरेश मण्डलले शिलान्यास गरेका छन् । यससँगै घर निर्माणको काम तीब्र गतिमा हुनेछ ।

यस कार्यक्रम अन्तर्गत जिल्लाका विभिन्न स्थानमा गरी ४ सय १० दलित परिवारको घर निर्माण हुने राज्यमन्त्री मण्डलले बताए ।

मधेशको सबभन्दा तल्लो पिंधमा जीवन व्यतीत गरिरहेका र सामाजिक विभेद छुवाछुत तथा चरम आर्थिक संकट खेपिरहेका डोम (मल्लिक) समुदायको पक्की घर निर्माण भएपछि उनीहरुको जीवनमा अर्थपूर्ण परिवर्तन आउने विश्वास उनको छ ।