राज्यमन्त्री मण्डलले वृक्षारोपण गरी मनाए छोराको जन्मदिन

न्यूज ब्यूरो, सिरहा । प्रदेश २ का उद्योग, पर्यटन, वन तथा वातावरण राज्यमन्त्री सुरेश कुमार मण्डलले वृक्षारोपण गरी छोराको जन्मदिन मनाएका छन् ।

राज्यमन्त्री मण्डलले छोरा स्वराजको प्रथम जन्मोत्सव वृक्षारोपण गरी मनाएका हुन् । जन्मदिनको अवसरमा विराटनगरस्थित महेन्द्र मोरङ क्याम्पस सरस्वती मन्दिर परिसर र वृद्धाश्रममा झन्डै सय वटा विभिन्न प्रजातिका वृक्ष रोपेको उनले जनाए ।

सो अवसरमा राज्यमन्त्री मण्डलसँगै छोरा स्वराज, पत्नी रिता मण्डल लगायत अन्य विशिष्ट व्यक्तित्वहरु सरिक थिए ।

जन्मदिनमा वृक्षारोपण अभियानलाई सार्थक बनाउन र वातावरण संरक्षणका लागि छोराको जन्मदिनमा वृक्षारोपण गरेको उनले बताए ।

जन्मदिनमा फजुल खर्च गरी भोज भतेर गर्नुभन्दा सामाजिक सेवा, गरिब तथा असहायहरुलाई सहयोग गरी तथा जन्मदिनमा विरुवा रोपेर हरियाली वातावरण निर्माण गर्दै वातावरण संरक्षणमा जुट्न पनि सबैलाई उनको आग्रह छ ।