समाजिक रुपान्तरणमा नयाँ पुस्ता : मिर्चैयामा र्याली प्रदर्शन

न्यूज ब्यूरो, सिरहा । सिरहाको मिर्चैयामा बलात्कार तथा लैङ्गिक हिंसाविरुद्ध सचेतना र्याली प्रदर्शन गरिएको छ ।

स्थानीय जनसेवा युवा क्लबले आइतबार ब्यानर तथा प्लेकार्डसहित मिर्चैयामा प्रदर्शन गरेको हो । पचास जना बढीको सहभागिता रहेको 'मौनता तोडौं, अन्यायविरुद्ध निर्धक्क बोलौं' भन्ने मूल नारासहितको उक्त र्याली मिर्चैयाको विभिन्न भागमा परिक्रमा गरी प्रदर्शन गरिएको थियो ।

बलात्कार, लैङ्गिक हिंसा तथा अचेल भइरहेका विभिन्न किसिमका अपराधजन्य कार्य न्यूनीकरणको उद्देश्यले सचेतना र्याली प्रदर्शन गरिएको क्लबका मिर्चैयाका अध्यक्ष रोविन साहले जानकारी दिए ।

समाजमा अहिलेको समयमा यस्ता अपराधजन्य कार्य हुँदै आएपनि पीडितले खुलेर बोल्न नसक्दा यसले झनझन प्रश्रय पाइरहेकाले यस कार्यक्रमले सबैलाई खुलेर बोल्न प्रेरित गर्ने आयोजक क्लबको विश्वास छ ।

समाजमा सचेतनाको अभाव र सरोकारबाला निकायको उदासीनताले पनि यस्ता कार्यले भयावह रुप लिँदै गएकाले रुपान्तरणका लागि युवा पुस्ता अगाडी आउनुपर्ने आवश्यकतालाई दृष्टिगत गर्दै यस किसिमका अभियानमा सक्रियता बढाएको क्लबले जनाएको छ ।

यस क्षेत्रमा यस्ता अन्यायमा परेका पीडितलाई न्यायको लागि आफूहरु चाँसो साथ पहल गर्ने भन्दै कसैलाई यस्ता कुनै आवश्यकता परे सम्झन क्लबले आग्रह पनि गरेको छ ।

यता, समाजिक रुपान्तरणका लागि युवा पुस्ता अगाडि आएकोमा यहाँका स्थानीय अगुवाहरुले सराहना गरेका छन् ।