जनप्रतिनीधिहरुको झगडाले लथालिँग धनौजी गाउँपालिका, कमिशन नमिलेपछि आएन बजेट

न्यूज ब्यूरो, जनकपुरधाम । धनुषाको दक्षीणी भेकमा रहेको धनौजी गाउँपालिकामा स्थानीय जनप्रतिनीधिहरुको खिचातानीले अझै बजेट ल्याउन सकेको छैनन् ।

जनप्रतिनीधिहरुको आपसी किचलो र विवादका कारण चालु आर्थिक वर्ष २०७७/०७८ को बजेट अझै ल्याउन नसकेका धनौजी गाउँपालिकाको विकास अवस्था लथालिँग भएको हो । प्रत्येक आर्थिक वर्षको लागि सो आर्थिक वर्षको एक महिना अगावै अर्थात असार १० गतेसम्म बजेट ल्याउनुपर्ने प्रावधान भएपनि धनौजी गाउँपालिकामा निरन्तर विवादले ठप्प भएको छ ।

जनप्रतिनीधि सहित राष्ट्रसेवक कर्मचारीहरुमा समेत कमिशनको भागबण्डा नमिलेपछि गाउँसभा हुन दिएको छैनन् । “यीनिहरु गाउँसभा हुनुभन्दा अघि नै कमिशनको प्रतिशत तय गर्छन् । गाउँपालिकाका हाकिम, वडाध्यक्ष, गाउँपालिका अध्यक्ष, उपाध्यक्ष, सचिव सबै मिलेर पहिले कमिशनको प्रतिशत तय गरेपछि मात्र गाउँसभा भइन्छ ।”– नाम नखोल्ने शर्तमा एक स्थानीयले भने ।

गाउँपालिकामा महिनैपिच्छै जसो प्रमुख प्रशासकीय अधिकृत परिवर्तनका कारण गाउँपालिका उपाध्यक्ष सहित केही वडाध्यक्षहरुले निरन्तर रुपमा गाउँपालिकामा तालाबन्दी गर्दै आएको कारण पनि गाउँसभा हुन सकेको छैनन् । यसअघि शम्भु ठाकुर प्रमुख प्रशासकीय अधिकृत रहेकोमा निरन्तर तालाबन्दीपछि केही दिन अघि मात्र कन्हैया मिश्र हाकिम बनेर गएपछि पनि गाउँसभा हुन सकेको छैनन् ।

बर्षैभरि विकास निर्माणमा शून्य झैं रहेको धनौजी गाउँपालिकामा कोरोनाको नाममा झण्डै डेढ करोड रुपैयाँ खर्च भएको बताएपनि त्यसको विवरण भने अझै दिएको छैनन् । अधिकृत कन्हैया मिश्रसँग सम्पर्क हुन सकेनन् ।