नगरपालिकाले मनोमानी गरी सार्वजनिक भवन बनाउँदा स्थानीय समस्यामा

न्यूज ब्यूरो, सिरहा । विकास निर्माणका कार्य गर्नु वा हुनु राम्रो पक्ष हो । विकास निर्माणका कार्य जनताको हित सोंचेर गरिनुपर्छ ।

तर, सिरहाको सुखिपुर नगरपालिकाको एक वडामा नागरिकलाई दुःख दिनेगरी काम गरिँदा स्थानीय समस्यामा परेका छन् ।

नगरपालिकाले वडा नम्बर १० स्थित नंगुर्वामा बनाइरहेको सार्वजनिक भवन स्थानीय एकजनाको जग्गाको मुखै छोपिने गरी मनमरी तरिकाले बनाइरहेको छ । सुखिपुर नगरपालिका ७ निवासी रामकुमार महताको कित्ता नम्बर १०६ को एक कठ्ठा २ धुर घडेरीको मुख नै बन्द गरी नगरपालिकाले सार्वजनिक भवन बनाउँदैछ ।

नगरपालिकाले भवन बनाइरहेको जग्गा सार्वजनिक हो । भवन निर्माण भइरहेको जग्गाको पछाडीमा स्थानीयहरुको घडेरी छ । नगरपालिकाले स्थानीयहरुसँग सरसल्लाह समेत नगरी भवन बनाउन थालेपछि रामकुमारका छोरा देवचन्द्र सिंहले नगरपालिकालाई विपक्षी बनाई अदालतमा मुद्दासमेत दायर गराएका छन् ।

उनको मुद्दापछि अदालतले मुद्दाको छिनोफानो नहुञ्जेलसम्म भवन निर्माण कार्य नगर्न आदेश दिएपनि नगरपालिकाले जवर्जस्ती गर्दा आफूहरु समस्यामा परेको उनले बताए ।

यता, यस सम्बन्धमा वडाध्यक्ष रामलखन महतोले नगरका मेयर रामऔतार यादवले आफूसँग सल्लाह पनि नगरी मनोमानी तरिकाले भवन निर्माण कार्य गराइरहेको बताए । भवन कति लागतमा बनिरहेको छ भन्ने कुरासमेत आफूलाई जानकारी नभएको उनी बताउँछन् ।