शहिदनगरका थप एक पुरुषको कोरोनाबाट मृत्यू

न्यूज ब्यूरो, जनकपुरधाम । धनुषामा थप एक जना पुरुषको कोरोना सँक्रमणबाट मृत्यू भएको बताइएको छ ।

धनुषाको शहिदनगर नगरपालिका वडा नं. १ चिरैया बस्ने अन्दाजी बर्ष ७० को पुरुषको कोरोनाबाट मृत्यू भएको हो । उनको बिहिबार साँझ करिब ५ बजेको समयमा मृत्यू भएको जनाइएको छ ।

लामो समयदेखि मुटु, दम तथा डायबिटिज रोगबाट ग्रसित ती पुरुषको स्वाशप्रश्वासमा समस्या भएपछि उनलाई गत असोज १८ गते जनकपुरको प्रादेशिक अस्पतालमा भर्ना गरिएको थियो । आईसियूमा राखेर उपचार गराईरहेका उनलाई असोज २१ गते बुधबार कोरोना पुष्टि भएको थियो ।

शंकाको आधारमा गरिएको स्वाब परीक्षणपछि उनमा कोरोना पुष्टि भएकोमा आज बिहिबार साँझ ५ बजे उनको उपचारकै क्रममा मृत्यू भएको हो ।

उनको मृत्यूपछि धनुषाको महेन्द्रनगर स्थित श्रीनाथगणबाट खटेको कोविड १९ शव व्यवस्थापन टोलीले मृतको शवलाई शहिदनगर नगरपालिका वडा नं. १ स्थित कमला नदीको रामघाटमा व्यवस्थापन गरेको जिल्ला प्रशासन कार्यालय धनुषाका अधिकृत गणेश मिश्रले जानकारी दिए ।