नयाँ रेल चाँडै चल्ने, पुरानालाई संग्रहालय बनाउने तयारी

न्यूज ब्यूरो, जनकपुरधाम । नयाँ रेल आए लगत्तै पुराना रेलका इन्जन तथा संरचनालाई संग्रहालय बनाउने तयारी थालिएको छ ।

पुरानो रेलका ईन्जिन, बोगी, डब्बा, पार्टपूर्जा लगायतका संरचनालाई नेपाल रेल्वे कम्पनीले संग्रहालय बनाउने तयारी थालेको हो । झण्डै सातवर्ष अघि बन्द भइसकेको नेपालको विजलपुरा–जयनगर नेरोगेज रेलको इन्जन तथा संचरचना जनकपुर र खजुरीमा राखिएको छ ।

भारतमा कब्जा गरेका अंग्रेजहरुले नेपालको चुरेबाट काठ ढुवानीका लागि वि.स. १९९४ भारतको जयनगरदेखि महोत्तरीको विजलपुरसाम्म रेल सेवा सञ्चालन गरेका थिए । पछि उक्त रेल जनकपुर देखि जयनगरसम्म चल्ने सेवामा सिमित भएको थियो ।

धनुषाको पूर्वी भेगका जनताका लागि एक मात्र यातायातको साधनको रुपमा रहेको उक्त रेल झण्डै ७ वर्षअघि जीर्ण भएर बन्द भएको थियो ।

जसको ईन्जिन र पार्टपूर्जा संरक्षण अभावमा धनुषाको जनकनन्दनी गाउँपालिको खजुरीस्टेशन र जनकपुर स्टेशनमा वेवारिसे अवस्थामा थन्काइएको छ ।

ती रेल तथा संरचनाहरुको अबलोकनका लागि संग्रहालय स्थापना गर्ने लक्ष्य लिएको कम्पनीका महाप्रबन्धक गुरु भट्टराईले जानकारी दिए । ब्रिटिसले चलाएको पुरानो स्टिम इन्जिनको इतिहास २ सयबर्ष पुरानो रहेको र यो इन्जिन संसारमा कतै पनि नभएको उनको दावी छ ।

नयाँ ब्रोडगेज रेल संचालन भए लगतै पुरानो नेरोगेज रेलको संरचनालाई संग्रहालय निर्माण प्रक्रिया अघि बढाउने तयारी रहेको उनले जनाए । नयाँ ल्याइएको रेल आवश्यक जनशक्ति व्यवस्थापन गरी जनकपुरको कुर्थादेख जयनगरसम्म चाँडै सञ्चालनमा आउने उनले बताए ।